Azərbaycanda karavanlardan istifadə bir turizm növü olaraq hələ ki formalaşmayıb. Ölkədə bir neçə karavanı olan şəxslər olsa da, karavanlar əksər hallarda səyahət üçün istifadə edilmir. Bu barədə 31 avqust tarixində Report.az araşdırma aparıb.
“Azərbaycanda karavanlardan istifadə üçün şərait yoxdur. Gürcüstanda, Türkiyədə park yerləri var, bizdə isə o şərait yaradılmayıb. Karavanın istifadəsi üçün xüsusi parkinqlər olmalıdır. Çünki onu istifadə etməyə enerji lazımdır. Enerji olmalıdır ki, onun içində soyuducu, kondinsioner və digər avadanlıqlar işləsin”, - deyə 5 karavan sahibi Ramin İbrahimov deyib.
Ramin İbrahimov əlavə edib ki, karavanları almaq üçün ona müraciət edən olmayıb, turizm şirkətlərində də heç bir təklif gəlməyib.
Araşdırma nəticəsində məlum olub ki, Azərbaycanda karavan istehsal edən şəxslər də var. Onlardan biri, Ruslan Nəbiyev, məlumat verib ki, bu vaxtacan 5 karavan düzəldib.
“Bu iş bir qədər baha başa gəlir. Nisbətən ucuz karavanlar üçün müraciət olur. Bir dəfə arıçılıq təsərrüfatı üçün karavan hazırlamışam, bir dəfə isə mal-qara saxlayan fermer üçün. Turizm üçün karavan sifariş verən olmayıb. Bir karavanın ümumi qiyməti təqribən 7-8 min manata başa gəlir”, - Ruslan Nəbiyev söyləyib.
Azərbaycan Turizm Bürosunun şöbə müdiri Şərifə Həsənova bildirib ki, hazırda ölkəmizdə karavan turizminə elə böyük tələbat yoxdur. “Azərbaycanda nadir halda şirkətlər bu işlə məşğul olur. Bu sahəni inkişaf etdirmək üçün keçən ildən müəyyən araşdırmalara başlamışıq. Şirvan Milli Parkında kamp yerləri müəyyən edilib. Artıq qabaqcadan məlumat verməklə parkın ərazisində müəyyən kamp yerlərində çadır qurmaq olar”, - deyə o əlavə edib.
Karavan turizmi 1930-cu illərdən etibarən Avropada yayılmağa başlayıb. Hazırda dünyada karavan turizminin ən çox inkişaf etdiyi ölkə ABŞ hesab edilir.
