Bu gün "Azərbaycan Hava Yolları" (AZAL) şirkətinə məxsus sərnişin təyyarəsinin Qazaxıstanda qəzaya uğramasından bir il keçir.
Hadisə Azərbaycan aviasiya tarixində dərin iz buraxaraq ağır insan itkisi ilə yadda qalıb. 2024-cü il dekabrın 25-də Azərbaycan Hava Yollarına məxsus J2-8243 nömrəli Bakı-Qroznı reysini yerinə yetirən “Qusar” “Embraer E190AR” təyyarəsi Qazaxıstanın Aktau şəhərindən təxminən üç kilometr aralıda qəza enişi edib.
Təyyarə saat 07:56-da Bakıdan havaya qalxıb. Qroznıda əlverişsiz hava şəraiti səbəbindən reys əvvəlcə Mahaçqalaya, daha sonra Aktauya yönləndirilib. Ekipaj saat 08:35-də idarəetmə sistemində nasazlıqla bağlı qəza siqnalı verib, saat 08:49-da isə Aktauda təcili eniş tələb edib. Lakin saat 10:28-də təyyarə yerə çırpılıb.
Qəza zamanı göyərtədə 62 sərnişin və beş ekipaj üzvü olmaqla 67 nəfər olub. Onlardan 38 nəfəri həlak olub, 29 nəfər, o cümlədən iki uşaq xəsarət alıb.
37 Azərbaycan vətəndaşından 23-ü vəfat edib, 14-ü sağ qalıb. Rusiya vətəndaşlarından yeddi nəfər həlak olub, doqquzu sağ qalıb. Qırğızıstan vətəndaşlarının üçü sağ qalıb, Qazaxıstandan olan altı sərnişin isə həyatını itirib.
Qəza zamanı həlak olan ekipaj üzvləri - İqor Kşnyakin, Aleksandr Kalyaninov və Hökümə Əliyevaya ölümündən sonra Azərbaycanın Milli Qəhrəmanı adı verilib. Xəsarət alan bələdçilər Zülfüqar Əsədov və Aydan Rəhimli 1-ci dərəcəli “Rəşadət” ordeni ilə təltif olunublar.
Faktla bağlı Azərbaycan, Qazaxıstan və Rusiyada cinayət işləri başlanıb. Hadisə ilə əlaqədar dekabrın 26-da Azərbaycanda, 28-də isə Çeçenistanda matəm elan edilib. Dekabrın 28-də Rusiya Prezidenti Vladimir Putin Azərbaycan Prezidenti İlham Əliyevə zəng edərək üzrxahlıq edib.
Həlak olanların xatirəsini ehtiramla anır, sağ qalanlara və faciədə yaxınlarını itirən ailələrə bir daha səbr diləyirik.
Bu tarix yalnız faciəni deyil, eyni zamanda peşəkarlıq, fədakarlıq və insan həyatının dəyərini xatırladan bir gündür.
