Azərbaycan XIX əsrdən dünyada neft ölkəsi kimi tanınmağa başlayıb. 1848-ci ildə Bakıda, Bibiheybət yatağında qazılmış quyudan neft fontan vurmuş və bu hadisə dünyada neftin sənaye üsulu ilə çıxarılmasının başlanması kimi tarixə düşmüşdür.
XX əsrdə Azərbaycanın neft sənayesi sürətlə inkişaf edib, güclü istehsal bazaları və elmi mərkəzlər yaradılıb. Böyük Vətən müharibəsi illərində Sovet İttifaqında çıxarılan neftin 75%-i Azərbaycan tərəfindən təmin olunurdu. Bu, almanların məğlubiyyətə uğramasında böyük rol oynayıb.
1949-cu ildə bir neçə gəmi Bakı şəhərindən 110 km aralıda yerləşən sahildə dayanır. Həmin zaman gəmilər arasında körpülər salınır və evlər tikilir. 7 noyabr 1949-cu ildə bu ərazidə neftin çıxarılması üçün hazırlanmış xüsusi meydançada fontan vurur. Nəticədə sonralar Neft Daşları adlandırılan bu ərazidə dünyada ilk dəfə olaraq açıq dənizdə neft hasil olunur.
20 sentyabr 1994-cü ildə Heydər Əliyev tərəfindən “Əsrin müqaviləsi”nin imzalanması ilə Xəzər dənizində ilk dəfə olaraq neft və qaz yataqlarının birgə istismarına başlanıb. Məhz bu müqavilə müstəqillik bərpa olunduqdan sonra ölkənin neft-qaz sənayesinin dirçəlməsinin başlanğıcı olub.
16 avqust 2001-ci ildə hər il sentyabrın 20-sinin Azərbaycan Respublikasında “Neftçilər Günü” peşə bayramı kimi qeyd olunması haqqında Qərar imzalanıb.
