Noyabrın 20-si Azərbaycanın Milli Qəhrəmanı, Qarabağ müharibəsi şəhidi Gültəkin Əsgərovanın doğum günüdür.
Gültəkin Məlik qızı Əsgərova 20 noyabr 1960-cı ildə Bakı şəhərində anadan olub. O, 1978-ci ildə Nərimanov rayonundakı 200 saylı orta məktəbi bitirib.
Gültəkin Əsgərova 1983-1989-cu illərdə Azərbaycan Dövlət Tibb Universitetində təhsil alıb. Təhsil aldığı müddətdə o, Daxili İşlər Nazirliyinin Hərbi hospitalında əvvəlcə kiçik, sonra isə böyük tibb bacısı kimi çalışıb. Daha sonra o, Uroloji xəstəxanada anestezioloq-reanimatoloq vəzifəsində işləyib.
Gültəkin Əsgərova Birinci Qarabağ müharibəsi zamanı, 4 aprel 1992-ci ildə könüllü şəkildə cəbhəyə yollanıb. O, əvvəlcə Turşsuda, sonra isə Şuşada bir çox yaralı əsgərə tibbi yardım göstərib.
8 may 1992-ci ildə Şuşa işğal edildikdən sonra Gültəkin Əsgərova Laçının və Qubadlının müdafiəsində iştirak edib.
Gültəkin Əsgərova 20 iyun 1992-ci ildə Aranzəmin-Naxçıvanik istiqamətində gedən ağır döyüşdə həlak olub. O, Bakı şəhərində Şəhidlər xiyabanında dəfn edilib. Gültəkin Əsgərova ailəli idi və onun bir qızı yadigar qalıb.
Şəhid 20 iyun 1993-cü ildə “Azərbaycanın Milli Qəhrəmanı” adına layiq görülüb. Bakıda 200 nömrəli tam orta məktəb onun adını daşıyır. Əsgərovanın Bakı şəhərinin Nərimanov rayonunda büstü qoyulub, Xəzərdə üzən gəmilərdən biri onun adını daşıyır və gəmidə qəhrəmanımızın muzeyi yaradılıb.
