Ümumiyyətlə, bu günədək Abşeron rayonu üzrə 20 176 baş, Sumqayıt şəhəri üzrə 3 210 baş və Bakı şəhəri üzrə 17 800 baş iribuynuzlu heyvan birkalanıb. Bu barədə 14 aprel tarixində Kənd Təsərrüfatı Nazirliyi məlumat verib.
Bildirilib ki, təsərrüfat və heyvanlar haqqında məlumatlar heyvanların identifikasiyası və qeydiyyat sisteminə daxil edilib. İdentifikasiyanın həyata keçirilməsində məqsəd hər bir baş heyvanın yerdəyişməsinə, izlənilməsinə, xəstəliklərə nəzarətin təmin edilməsinə və heyvan mənşəli məhsulların “fermadan süfrəyədək” nəzarətinə nail olmaqdır.
Qeyd olunub ki, heyvanların identifikasiyası sistemini sınaqdan keçirmək üçün pilot kimi Bakı, Sumqayıt şəhərləri və Abşeron rayonu seçilib. Həmin ərazilərdə baytarlıq fəaliyyəti ilə məşğul olan 29 özəl baytar həkiminə təlimlər keçirilib və onlar lazım olan avadanlıq və ləvazimatlarla təmin olunublar.
