Bakıda 23 yaşlı Fatimə Ramazanova azyaşlı qızına qarşı dəfələrlə fiziki zorakılıq və işgəncə törətməkdə təqsirli bilinərək məhkəmənin hökmü ilə 2 il 6 ay müddətinə azadlıqdan məhrum edilib.
Teleqraf.az xəbər verir ki, Cinayət materiallarına əsasən, o, 2021-ci il təvəllüdlü qızını taxta oxlov, elektrik naqili, dəri kəmər və digər əşyalarla döyüb, həmçinin sobada qızdırılmış kəfgirlə uşağın əlinə, qoluna və burnuna yanıq xəsarətləri yetirib. Sonuncu hadisə bu ilin martında baş verib – ana qızını yemək yemədiyinə görə kəmərlə döyüb.
Psixoloqun iştirakı ilə ifadə verən uşaq bildirib ki, anası onu mütəmadi olaraq döyüb, üzərinə isti su töküb, saçından dartıb, gecələr tək ayaq üstə saxlayıb. O həmçinin anasının birgə yaşadığı Roma adlı şəxsin də siqaretlə bədənini yandırdığını deyib.
Uşağın işgəncələrə məruz qalmasını əks etdirən videogörüntülər sosial şəbəkələrdə yayılıb.Fatimə həmin videonu “uşağı yeməyə öyrətmədiyi üçün günahkar” saydığı qadına göndərib.
Uşaq hazırda “Azərbaycan Uşaqları” İctimai Birliyinin sığınacağında yaşayır. Sığınacaq rəhbəri Kəmalə Ağazadənin sözlərinə görə, azyaşlı ilk günlər danışmaqdan imtina edib, bədənindəki xəsarətlər səbəbindən 2 ay ona toxunmaq mümkün olmayıb.
Suraxanı Rayon İcra Hakimiyyəti Fatimə Ramazovanın analıq hüququndan məhrum edilməsi üçün məhkəməyə müraciət edib. İş hazırda baxılma mərhələsindədir.
