Bakıda SSRİ bayraqları ilə yürüş etməyə cəhd edən qrupun görüntüləri sosial şəbəkələrdə yayılaraq gündəm olub. Daxili İşlər Nazirliyinin keçirdiyi əməliyyatla yürüşün təşkilatçıları – o cümlədən İbrahim Əsədli saxlanılıb və onlar barəsində cinayət işi açılıb.
İnsanoid.com xəbər verir ki, istintaq müəyyən edib ki, həmin şəxslər xarici maliyyə dəstəyi ilə ofis icarəyə götürərək qrup halında fəaliyyət göstərib, kommunist ideologiyasını təbliğ edib və müxtəlif təbliğat materialları toplayıblar.
Lakin bu fiqurun adı bununla bitmir. Məlum olub ki, SSRİ bayrağı ilə yürüş etməyə cəhd göstərən həmin İbrahim Əsədli, bir müddət əvvəl Bakıda həyat yoldaşı Aynur Əsədlini sevgilisi ilə birlikdə döyməklə ölkə gündəminə düşmüş tanınmış onkoloq həkimdir.
Hadisə Nizami rayonunda, “Loğmed” klinikasının qarşısında baş verib. İbrahim Əsədli qeyri-rəsmi münasibətdə olduğu digər Aynur adlı qadınla birlikdə həyat yoldaşını döyüb, mübahisə həm klinikada, həm də həyətində davam edib. Zərərçəkən qadın polisə müraciət edib və iş üzrə ekspertiza aparılıb.
Azərbaycan səhiyyə ictimaiyyətini sarsıdan başqa bir detal isə belədir: araşdırmalar zamanı İbrahim Əsədlinin müvafiq sertifikatı olmadan həkim kimi çalışdığı ortaya çıxıb. Bu qalmaqaldan sonra o, “Loğmed” klinikasından tamamilə uzaqlaşdırılıb.
Daha sonra İbrahim Əsədlinin ölkədən qaçdığı üzə çıxıb. Həyat yoldaşı bildirib ki, o, martın 21-dən sonra evə qayıtmayıb və gizli şəkildə Azərbaycanı tərk edərək sevgilisi ilə birlikdə İtaliyaya gedib. Arxasında isə xəstələr, ailə problemleri və istintaq sənədləri qalıb.
Beləliklə, SSRİ bayrağı qaldıran qrupun mərkəzində duran adamın adı yalnız siyasi aksiyada yox, həm də şiddət, etik pozuntu, saxta fəaliyyət və ölkədən qaçmaq kimi çoxsaylı qalmaqallarla hallanır.
