Elm və Təhsil Nazirliyi ilə İctimai Televiziya və Radio Yayımları Şirkətinin birgə təşəbbüsü və layihəsi əsasında “Mən, Lalə, bir də Şerlok Holms” adlı teleserial çəkilir.
İnsanoid AZƏRTAC-a istinadən xəbər verir ki, çəkilişlər əsasən Balakən rayonunda həyata keçirilir.
Serialın əsas qəhrəmanı 7-ci sinif şagirdi Muraddır. Zəngin fantaziyaya malik Murad növbəti dəfə yay tətilinə çıxıb və istəməsə belə, valideynləri işdə olduğu üçün bütün yayı nənə və babasının yanında – kənddə keçirəcək. Murad kənddə həmyaşıdı olan Lalə və digər kənd uşaqları ilə dostlaşır. Lalə ona kənd həyatının incəliklərini öyrədir, Murad isə Laləni şəhərdən gətirdiyi qacetlər və oxuduğu kitablardan öyrəndiyi maraqlı faktlarla təəccübləndirməyə çalışır.
12 hissədən ibarət teleserialda baş rol ifaçısı - “Şerlok Holms” obrazını Əməkdar artist Rasim Cəfər canlandırır.
Teleserialın quruluşçu rejissoru Rüfət Şahbazovun sözlərinə əlavə edir ki, “Mən, Lalə, bir də Şerlok Holms” Azərbaycanda ilk uşaq serialı olacaq.
Sözügedən teleserialda “Eurovision 2011” təmsilçimiz, müğənni Eldar Qasımov da rol alır.
Serialın ideya müəllifi və ssenaristi Tural Sevdimalı və Vüqar Hüseynovdur. Serialın qarşıdakı aylarda təhvil verilməsi nəzərdə tutulur.
