Gəncə Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Maqsud İmanovun (adı, soyadı şərtidir) cinayət işi üzrə məhkəmə istintaqı başa çatıb.
Pravda.az xəbər verir ki, hakim Bəhruz Müslümovun sədrliyi ilə keçirilən prosesdə hökm oxunub.
Məhkəmənin hökmü o, 1 il müddətə azadlıqdan məhrum edilib.
İttihama görə, hadisə 07 dekabr 2024-cü il tarixdə, saat 23:20 radələrində Bərdə şəhəri, Sabir küçəsində yerləşən “3 nömrəli park” adlanan ərazidə qeydə alınıb.
Belə ki, Maqsud İmanov həmin parkda yerləşən çayxananın qarşısında qonşusu, zərərçəkmiş Məğrur İsgəndərovla (adı, soyadı şərtidir) saat 22 radələrində aralarında baş vermiş mübahisəni bəhanə edərək, sonuncunun guya onu təhqir etməsini əsas gətirib, hər hansı qanuni və ya əsaslı səbəb olmadan üzərində gəzdirdiyi cib bıçağı ilə ona qarşı hücuma edib. Təqsirləndirilən şəxs xuliqanlıq və qəsdən xəsarət yetirmə niyyəti ilə zərərçəkmiş şəxsin döş qəfəsinin sol arxa və sol yan nahiyələrinə iki dəfə bıçaq zərbəsi endirərək xəsarət yetirib.
Məhkəmə iclasında Maqsud İmanov elan olunmuş ittiham üzrə özünü qismən təqsirli bilib, ifadəsində göstərib ki, hadisə vaxtı içkili vəziyyətdə olub, zərərçəkmiş şəxsin ona nalayiq ifadələr işlətməsi səbəbindən cibindəki bıçağı çıxardaraq sonuncuya iki zərbə endirib. O, ifadəsində əlavə edib ki, həmin gün Məğrurla birlikdə spirtli içki qəbul edib və zarafatlaşma zəminində yaranmış mübahisə nəticəsində hadisə baş verib.
