Bu gün Azərbaycanlı milyonçu, xeyriyyəçi, Rusiya imperiyasının Həqiqi Dövlət Müşaviri, müsəlman Şərqində ilk qızlar məktəbinin yaradıcısı, II və III dərəcəli Müqəddəs Stanislav ordeni laureatı Hacı Zeynalabdin Tağıyevin anım günüdür.
Hacı Zeynalabdin Tağı oğlu Tağıyev 25 yanvar 1838-ci ildə Bakıda çəkməçi ailəsində anadan olub.
1873-cü ildə Bibiheybətdə şəriki ilə birgə torpaq sahəsi alan Tağıyev düz 5 il öz əziyyətinin bəhrəsini gözləmişdir. Nəhayət, 1878-ci ilin əvvəlində buruqda çoxdan gözlənilən neft fontanı vurur. Hacı Bakının ən varlı adamlarından birinə, onun az tanınan mədəni isə böyük müəssisəyə çevrilir.
1901-ci ildə Hacı Zeynalabdin Tağıyevin təşəbbüsü ilə Bakıda Tağıyevin qızlar məktəbi adı ilə tanınan, İmperatriça Aleksandra Fyodorovnanın adına rus-müsəlman qız məktəbi açılıb. Bu məktəb Şərqdə müsəlman qızları üçün ilk dünyəvi tədris müəssisəsi olub.
Həmçinin 1883-cü ildə Tağıyev öz vəsaiti hesabına Azərbaycanda ilk teatr binasını inşa etdirib.
Tağıyev 1901-ci ildə ingilis mühəndisi Vilyam Lindley tərəfindən yeraltı suların qazılması işlərinə 25 min rubl vəsait ayırıb və 1917-ci ildə Bakıya içməli su gətirən kəmər istifadəyə verilib.
Hacı Zeynalabdin Tağıyev 1 sentyabr 1924-cü ildə Mərdəkanda yerləşən bağ evində vəfat edib. O, Mərdəkandakı “Pirhəsən” pirində, böyük hörmət bəslədiyi Axund Mirzə Abuturabın qəbri yaxınlığında dəfn edilib.
