18 oktyabr 2020-ci ildə Azərbaycan Ordusu Cəbrayıl rayonunda, Araz çayının üzərində yerləşən Xudafərin körpüsünü və ətraf əraziləri Ermənistan Silahlı Qüvvələrinin işğalından azad edib. Həmin gün Cəbrayıl rayonunun daha iki yaşayış məntəqəsi – Hacılı və Hacı İsaqlı kəndləri işğalçılardan azad edilib.
16 noyabr 2020-ci ildə Prezident İlham Əliyev və birinci xanım Mehriban Əliyeva işğaldan azad edilən Cəbrayıl rayonunda olublar.
Ehtimal edilir ki, Xudafərin körpüsü 1027-ci ildə Şəddadi hökmdarı Fəzl ibn Məhəmməd tərəfindən inşa olunub. Bu körpü Azərbaycanın Hindistandan başlayaraq Yaxın və Orta Şərq, Rusiya və Qərbi Avropa ölkələri ilə iqtisadi və mədəni əlaqələrinin inkişafında böyük əhəmiyyət daşıyıb.
Körpünün “Xudafərin” adlandırılması ilə bağlı bir neçə versiya mövcuddur. Bir versiyaya görə, körpü sal daşlardan qurulduğundan bu cür adlandırılmışdır. Orta əsr mənbələrində abidənin adı “Xuda-Afərin” kimi qeyd olunur, bu isə “Allah tərəfindən yaradılmış”, “Allaha Mərhəba” mənalarını verir.
1993-cü ildə Ermənistan Silahlı Qüvvələri tərəfindən Xudafərin körpüsünün yerləşdiyi Cəbrayıl rayonu işğal edilib.
