Bugün ölkədə Milli Dirçəliş Günü qeyd olunur. Həmin gün 1988-ci ildə Bakının əsas meydanı sayılan “Azadlıq”da Qarabağ məsələsində respublika və SSRİ orqanlarının xalqımıza zidd siyasət apardıqlarına görə, cəmiyyətin davamlı mitinqləri başlamışdır. Azərbaycanda bu hadisələr milli-azadlıq hərəkatı kimi qiymətləndirilir və sovet hökümətinə qarşı ilk kütləvi etiraz sayılır.
1988-ci ilin ilk günlərində Ermənistanın Azərbaycana qarşı açıq təcavüzü başlamışdır. Ermənistan hökumətinin tapşırığı ilə Ermənistanda yaşayan 200 mindən çox azərbaycanlı öz ata-baba yurdlarından kütləvi şəkildə qovulmuşdur, qismən öldürülmüşdür.
Fevralda isə ermənilər Dağlıq Qarabağın Ermənistana birləşdirilməsi məsələsini qaldırmışdılar. Buna etiraz olaraq xalqımız ayağa qalxmışdır.
17 noyabr tarixində Azərbaycan ictimaiyyətinin uzunmüddətli mitinqləri başlamışdır. Bəzi hesablamalara görə, həmin günlərdə meydanda bir milyona yaxın insan toplaşmışdı. Bu mitinqlərdə meydanda ilk dəfə Azərbaycanın üçrəngli bayrağı qaldırılmışdır.
Dekabrın 4-nə keçən gecə isə qoşun və zirehli texnikanın tətbiqi ilə mitinq dağıdılmış, 400-ə yaxın etirazçı həbs edilmişdir. Buna baxmayaraq, sovet höküməti Azərbaycan xalqının milli-azadlıq hərəkatının qarşısını ala bilməmişdir. Respublikanın digər şəhərlərində də etiraz aksiyaları keçirilmişdir.
