Əməkdar artist Cabir İmanovun bu ilin sentyabrında vəfat etməsindən sonra onun daha əvvəl çəkildiyi reklamlara aid lövhələrin Bakı Metropoliteninin stansiyalarında, efirlərdə, nəqliyyat vasitələrinin üzərində, bilbordlarda və s. hələ də qalması sosial şəbəkələrdə müzakirələrə səbəb olub.
Ölkə.Az xəbər verir ki, bəzi insanlar ölən şəxsin üzərindən kimlərinsə pul qazandığını deyərək, bu vəziyyəti tənqid ediblər.
“Bakı Metropoliteni” Qapalı Səhmdar Cəmiyyətindən sorğumuza cavab olaraq bildirilib ki, metropoliten sözügedən müqavilənin tərəfi olmadığından, reklam yayımı prosesinə müdaxilə etmək səlahiyyətinə malik deyil.
Məsələyə aydınlıq gətirmək üçün C.İmanovun reklamına çəkildiyi süd məhsullarını ölkəyə gətirən distribyutor şirkət olan “Aqro-Vest DC” MMC ilə əlaqə saxladıq. Şirkətin Marketinq meneceri Tural Məmmədov açıqlamasında bu sözləri deyib:
“Cabir bəylə həm insan kimi, həm də partnyor kimi çox yaxşı münasibətlərimiz olub. O, bizim dəyərli aktyorumuz idi. Xatirəsinə hörmət əlaməti olaraq reklamları sökmədik. Həm də müqaviləmiz var. Müqavilə uzunmüddətlidir və biz onun fotosundan istifadə etmək üçün illik ödəniş etmişik. Vəfat etdiyi gün aktyora hörmət əlaməti olaraq efirlərdə onun iştirak etdiyi reklam çarxlarının yayımını müvəqqəti olaraq dayandırmışıq. Hətta buna görə ailəsi bizə təşəkkür də edib. Amma metroda reklam lövhəsinin dəyişdirilməsi daha böyük vəsait tələb edir. Biz reklamlarla bağlı Tahir bəylə və ailə üzvləri ilə danışmışıq, reklamların yayımının davam etməsinə etiraz etmədiklərini deyiblər”.
Şirkətin təmsilçisi Cabir İmanovun çəkildiyi və hələ yayımlanmayan reklam çarxlarından da söz açıb:
“Bizim mərhum əməkdar artistlə növbəti illərdə də yayımlamağı düşündüyümüz işlərimiz var. Onun xatirəsini yaşatmaq istəyirik. İnşallah, yaxın günlərdə onun efirə çıxmayan 2 videorolikini yayımlamağı düşünürük. Müqavilə şərtlərinə uyğun olaraq da C.İmanovun ailə üzvlərinə qonorar verməyi düşünürük. Bunun üçün də təbii ki, ailə üzvlərindən razılıq alacağıq”.
Qeyd edək ki, C.İmanov sentyabrın 29-da Səbail rayonu Üzeyir Hacıbəyli küçəsində yerləşən idman zalında infarkt keçirib. Hadisə yerinə təcili tibbi yardım briqadası çağırılsa da, 49 yaşlı aktyoru xilas etmək mümkün olmayıb. O, Yasamal qəbiristanlığında dəfn edilib.
