Boks üzrə Azərbaycan millisinin sabiq kapitanı, 51 yaşlı Əli İsmayılov reytinq döyüşündə ardıcıl üçüncü qələbəsini qeyd edib.
Belə ki, bu günlərdə “Bürünc Əli” (dünya və Avropa çempionatlarında qazandığı bürünc medalların çoxluğuna görə qazandığı ləqəb) Türkiyənin Fethiye şəhərində 28 yaşlı yerli boksçu Erhan Uzunla reytinq döyüşünə çıxıb.
Azərbaycanlı veteran boksçu səkkiz raundluq döyüşü altıncı raundda texniki nokautla bitirərək, inamlı qələbə qazanıb.
İdman.biz-ə müsahibə verən 51 yaşlı Əli İsmayılov qarşısına qoyduğu hədəflərdən danışıb.
- Döyüşün necə keçdiyindən danışın...
- Səkkiz raundluq döyüş gözlənilirdi, amma altıncı raundda boyu iki metrə yaxın olan rəqibim artıq taqətdən düşdü. İlk dəqiqlərdən o yaxşı başlamışdı, üç raund aktiv idi, lakin sonra təcrübə öz sözünü dedi. Mən isə öz gücümə qənaət edirdim, zərbələrdən yayınmağa çalışırdım. Dördüncü raunddan etibarən artıq sürətimi artırmağa, ikili, üçlü zərbələrlə cavab verməyə başladım. Nəticədə, mən zərbələrin sayında qarşı tərəfi üstələdim. Beşinci raundda ona iki tutarlı zərbə endirdim. O, yıxılmadı, amma mənə sığınaraq özünə gəlməyə çalışdı. Artıq rəqibimin yorulduğunu hiss etdim. Altıncı raundda o, artıq döyüşməkdən imtina edirdi. Görünür, türkiyəli boksçu mənim hücumlarıma tab gətirə bilməyəcəyini anladı.
Siz uğurlu qələbə seriyası yaxalamısız, elə deyilmi?
- Bəli, bu, reytinq döyüşündə artıq üçüncü qələbəmdir. Hamının məni alqışlaması və insanların 51 yaşlı bir boksçunun hələ də belə mübarizə apara bilməsinə heyran qalmaqları mənim üçün xoş idi.
- Sizin yaşınızı nəzərə almamaq mümkün deyil. Döyüşdən sonra özünüzü necə hiss edirdiniz?
- Həmin gün özümü gümrah hiss edirdim. Yorğunluq yox idi. Ertəsi gün yuxudan oyandım və hər tərəfimdə qançırlar və şişlər gördüm. Rəqibim gənc, zərbələri isə tutarlı idi. Evə çatan kimi bütün bu qançırlar və qabarları aradan aparmaq üçün birbaşa buxar otağına getdim. Amma nə etsən də, yaş öz təsirini göstərir. Bərpa prosesi 25 yaşında olduğu qədər sürətli deyil.
Üstəlik, sürətim əvvəlki kimi deyil. İlk iki raundda Erhan Uzunun məndən sürətli olduğunu gördüm, bir yumruqdan yayınsam da, ikincisi mənə dəyirdi. Amma üçüncü raundda tempi tuta bildim və rəqibin zərbələri boşa getməyə başladı. Məhz qeyri-dəqiqi zərbələr rəqibimi gücdən salmağa başladı. Təcrübəm sürətdə geridə qalmağımı kompensasiya etməyə imkan verir.
- Gələcək planlarınız nədir?
- Hazırda bu ilin oktyabrında Praqada, dekabrda isə Berlində artıq çempionluq kəməri uğrunda döyüşlə bağlı danışıqlar gedir. Artıq 20 yaşım yoxdur ki, zaman ötürüm, mümkün qədər tez şəkildə titul uğrunda döyüşə çıxmalıyam.
-Siz həm də MDB-nin çempionluq kəmərinə sahibsiz...
- Mən hətta onu qoruyub saxlamağa fürsət tapdım (gülür – red.) Nəzərinizə çatdırım ki, ötən yay Moskvada dağıstanlı Rəsul Maqomedovu ikinci raundda nokaut edərək bu kəməri qazanmışdım. O zaman hamı şoka düşdü. Çoxları bunun təsadüf olduğunu düşünərək, bu ilin mayında revanş görüşünü təşkil etdilər. Nəticədə onu yenidən məğlub etdim.
Düzdür, bu dəfə onu nokaut etmək üçün mənə əlavə bir raund da lazım oldu. Hətta ona yazığım da gəldi. İlk məğlubiyyətdən sonra onun qanı qaralmışdı, ikinci məğlubiyyətdən sonra isə tamamilə pərişan hala düşdü (gülür – Red.).
Amma daha ciddi turnirlərdə çempionluq kəmərləri qazanmalıyam və ümid edirəm ki, ilin sonuna qədər daha bir titul qazanacağam. Gələcəkdə dünya səviyyəli döyüşlərə çıxmağı hədəfləyirəm.
