“44 gün ərzində biz hər gün irəli gedirdik, bir gün belə geri addım atmamışıq. Ermənistan ordusunda 10 min fərari ola-ola, Azərbaycan Ordusunda bir nəfər də döyüş meydanından qaçmırdı”. Bunu Azərbaycan Prezidenti İlham Əliyev noyabrın 8-də Şuşada hərbçilər qarşısında çıxış edərkən bildirib.
Onun sözlərinə görə, Azərbaycan öz torpaqlarını qaytarmaqla başqa böyük dövlətlərdən asılı olmadığını göstərib. Dövlət başçısı bunu söyləyərkən iqtisadi müstəqilliyimizi vurğulayıb.
“Qarabağ Ermənistandır” deməklə qarşı tərəf danışıqlara son qoyub. Bizim üçün müqəddəs olan Şuşada saxta andiçmə mərasimi keçirmək və oraya qondarma qurumunun parlamentini köçürmək bizim üçün təhqir idi. Biz nə qədər dözməli idik? Kimsə onların dərsini verməli idi, ya yox?”, - deyə Azərbaycan lideri əlavə edib.
Qeyd edək ki, bugün Qarabağ qələbəsinin birinci ildönümü münasibətilə ölkədə Zəfər Günü qeyd olunur. Bu tarixdə Şuşa şəhəri işğalçılardan azad edilmişdir.
