Xəbər verdiyimiz kimi, Əməkdar artist Cabir İmanov bu gün Bakıda məşq etdiyi idman zalında infarkt keçirərək dünyasını dəyişib. Hadisə Səbail rayonu, Üzeyir Hacıbəyli küçəsində yerləşən zalda baş verib.
İlkin məlumata görə, aktyor zala daxil olduqdan bir neçə dəqiqə sonra oturaraq qəfil yıxılıb. Hadisə zalın təhlükəsizlik kameraları vasitəsilə anbaan lentə alınıb. Onun yaxınlığındakı şəxslər dərhal kömək etməyə çalışaraq ürək masajı edib, daha sonra elektroşok tətbiq olunub. Bu proses 20 dəqiqə davam etsə də, 49 yaşlı aktyorun həyatını xilas etmək mümkün olmayıb.
Jurnalist Elvin Elxan sosial şəbəkə hesabında hadisənin şahidi olduğunu bildirib:
"Zala daxil oldu, bir neçə dəqiqə sonra oturdu və yıxıldı. Həyatımın ən böyük travmasını aldım. İlk dəfə birinin ölümünün şahidi oldum. O adam ki, ən gözəl məşq yoldaşı idi. Allah rəhmət eləsin!" – deyə o yazıb.
Bu gün saat 13:38-də Səbail rayonu Üzeyir Hacıbəyli küçəsi ərazisindən əməkdar artist Cabir İmanovun (1976-cı il təvəllüdlü) səhhətinin pisləşməsi (yıxılma) səbəbilə Respublika Təcili və Təxirəsalınmaz Tibbi Yardım Mərkəzinə çağırış daxil olub.
Bu barədə İnsanoid.com-un sorğusuna cavab olaraq, TƏBİB-dən məlumat verilib.
Çağırış ünvanına dərhal təcili tibbi yardım briqadası cəlb olunub. Saat 13:50-də briqada tərəfindən əməkdar artistin həkiməqədər ölüm faktı qeydə alınıb.
14:30
Əməkdar artist Cabir İmanov vəfat edib.
Qafqazinfo.az xəbər verir ki, o bu gün infarkt keçirərək dünyasını dəyişib.
Xatırladaq ki, Cabir İmanov 22 iyun 1976-cı ildə Bakı şəhərində anadan olub. O, 1992–2001-ci illərdə "Parni iz Baku" KVN komandasının üzvü olub, 1992-ci ildə KVN çempionu, 1995-ci ildə KVN Yay Kubokunun sahibi və 2000-ci ildə KVN "Əsrin Çempionu" olub.
2001-ci ildən "Planet Parni iz Baku" KVN Teatrının aktyoru idi.
14 sentyabr 2015-ci il tarixdə Azərbaycanın Əməkdar artisti fəxri adına layiq görülüb. 16 oktyabr 2021-ci il tarixdə Azərbaycan mədəniyyətinin inkişafında xidmətlərinə görə “Tərəqqi” medalı ilə təltif olunub.
