Vətən müharibəsi zamanı, 4 oktyabr 2020-ci il tarixində, səhər saat 10:00 radələrində Gəncə şəhəri Ermənistan silahlı qüvvələrinin raket atəşinə məruz qalıb. Bu hücum Ermənistan tərəfindən müharibənin getdiyi Qarabağ bölgəsindən kənarda edilən ilk ciddi hücum idi.
Atılan raketlər Gəncənin mülki yaşayış məntəqəsinə düşüb. Hücum nəticəsində 32 mülki şəxsin yaralanması ilə yanaşı, 1 mülki şəxs – Əliyev Tunar Qoşqar oğlu şəhid olub. Həmçinin yaşayış evləri, mülki infrastruktur və qədim tikililərə də ziyan dəyib.
44 günlük Vətən müharibəsi zamanı Gəncə 5 dəfə raket hücumuna məruz qaldı. Nəticədə qadınlar, qocalar, azyaşlı uşaqlar daxil olmaqla, çox sayda insan həlak oldu və yaralandı. Həmçinin mülki infrastruktur obyektlərinə və nəqliyyat vasitələrinə külli miqdarda ziyan dəydi.
