Gəncədə dəhşətli qətlin təfərrüatları üzə çıxmaqda davam edir. Xəbər verdiyimiz kimi, 30 yaşlı Ayşən Sadıqova noyabrın 7-də İsrafil bəy Yadigarzadə küçəsində bıçaqlanaraq qətlə yetirilib. Qadın xəstəxanaya aparılarkən yolda dünyasını dəyişib. Əməliyyat-axtarış tədbirləri ilə cinayəti törətməkdə şübhəli bilinən keçmiş həyat yoldaşı, 42 yaşlı Ramin Alıyev polis tərəfindən tutulub.
Gencexeber.az-a mərhumun anası Mehriban Sadıqova tərəfindən bildirilib ki, Ramin Alıyev təxminən dörd il əvvəl Zümrüd adlı (ad şərtidir) gənc bir qadınla sevgi münasibəti qurub və məhz bundan sonra ailədə gərginlik pik həddə çatıb. Onun sözlərinə görə, Ayşən bu illər ərzində sistematik şəkildə zorakılıq, təhqir və döyülmələrə məruz qalıb.
İddialara əsasən, Ramin həm həyat yoldaşı və üç uşağı ilə Gülüstan qəsəbəsində kirayədə yaşayıb, həm də Zümrüd üçün ayrıca ev tutaraq onunla münasibəti davam etdirib.
Mehriban xanımın sözlərinə görə, Ramin Zümrüdə dəyəri 4 min manat olan telefon, həmçinin çoxsaylı qızıl-zinət əşyaları alıb. Ancaq bu müddət ərzində öz övladlarına baxmayıb, onların qayğısını və bütün xərclərini nənələri — mərhumun anası qarşılayıb.
Hadisə ilə bağlı diqqətçəkən məqam isə Zümrüdün bir neçə ay əvvəl Ayşənin uşaqları ilə yaşadığı binanın həyətinə içkili vəziyyətdə gələrək səs-küy salması olub. Qonşuların dediyinə görə, o, məhəllədə qışqıraraq Ayşənin Ramindən ayrılmasını tələb edib, nalayiq ifadələr səsləndirib.
"Kürəkənimin sevgilisi qızımı təhqir edirdi. Saysız-hesabsız zənglər olurdu. Söyüş söyürdü, təzyiq göstərirdi", - mərhumun anası Mehriban Sadıqova əlavə edib.
Gərginlik fonunda Ramin Alıyev hadisə yerinə gəlib və Zümrüdü zorla maşına mindirərək aparıb. İddialara görə, bundan qəzəblənən qadın onu hüquq-mühafizə orqanlarına şikayət də edib.
Mehriban Sadıqova əlavə edib ki, Raminin bu paralel münasibəti, eləcə də qadının tələblərini təmin etmək üçün yaratdığı xərclər nəticəsində on minlərlə manat borcu yaranıb.
Hazırda cinayət işi üzrə araşdırmalar davam edir.
