Vəkil Zabil Qəhrəmanova ittiham elan olunub.
Apa.аz xəbər verir ki, Zabil Qəhrəmanov Cinayət Məcəlləsinin 221.2.2-ci(xuliqanlıq - ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə və ya digər şəxsə müqavimət göstərmək) maddəsi üzrə ittiham olunur.
Onunla bağlı təqdimata bu gün məhkəmədə baxılacağı gözlənilir.
Qeyd edək ki, Zabil Qəhrəmanov dünən, oktyabrın 23-də polis tərəfindən saxlanılıb.
Onun Gəncədə avtoyuma məntəqəsində bir nəfərlə mübahisə edərək həmin şəxsə xəsarət yetirdiyi iddia olunur.
Faktla bağlı Gəncə Şəhər Baş Polis İdarəsində araşdırma aparılır.
Xatırladaq ki, bir neçə gün əvvəl Zabil Qəhrəmanovun vəkillik fəaliyyəti müvəqqəti dayandırılıb. Bununla bağlı Vəkillər Kollegiyasının Rəyasət Heyəti qərar qəbul edib. Qərara əsasən, Z.Qəhrəmanovun vəkillik fəaliyyəti 6 aylıq dayandırılıb.
Qeyd edək ki, Gəncədə yaşayan vəkil daha çox Tovuzda 10 yaşlı Nərmin Quliyevanı qətlə yetirməkdə təqsirləndirilən İlkin Süleymanovun müdafiəçisi kimi tanınıb. O, həmçinin qətl ittihamı ilə 11 il həbsə məhkum edilən şəxsin 4 il sonra bəraət alması ilə bağlı da gündəmə gəlib.
