Goranboy rayonunda baş verən qətl hadisəsinin uşaq üstündə törədildiyi məlum olub. Bu haqda 25 martda Trend xəbər yayıb.
Yevlax şəhərindən olan Mehman Süleymanov bir il əvvəl həyat yoldaşı Əfsanə Məmmədovadan ayrılsa da, rəsmi boşanmayıb. Onların iki oğlu, bir qızı var. Qadın bir il əvvəl uşaqları ilə birlikdə Dəliməmmədliyə, atasının evinə gəlib.
Məlumatda deyilir ki, M.Süleymanov qətli həyat yoldaşının ondan uşaqları qizlətdiyi üçün törədib.
***
11:01
Goranboyda həyat yoldaşını maşınla vuran, sonra isə bıçaqlayan şəxsə cinayət işi açılıb. Bu haqda martın 25-də Baş Prokurorluq məlumat verib.
Hadisə 24 mart tarixində 13:00 radələrində rayonun Dəliməmmədli şəhərində yerləşən musiqi məktəbinin yaxınlığında qeydə alınıb. 1977-ci il təvəllüdlü Mehman Süleymanov idarə etdiyi «Land Rover Discovery» markalı avtomobillə bir ildir faktiki olaraq ayrı yaşadığı arvadı 1985-ci il təvəllüdlü Əfsanə Məmmədovanı vurub. Daha sonra isə o, qadına bıçaqla bir neçə kəsilmiş-deşilmiş xəsarətlər yetirib.
Ə.Məmmdədova aldığı xəsarətlərdən dünyasını dəyişib.
Dindirilən zaman Mehman Süleymanov törətdiyi əməli etiraf edib. Faktla bağlı “qəsdən adam öldürmə” maddəsi ilə cinayət işi başlanıb.
