“Qarabağ münaqişəsinə artıq son qoyulub, Qarabağ Azərbaycanın daxili işidir". Bunu Prezidentin köməkçisi Hikmət Hacıyev noyabrın 6-da VIII Qlobal Bakı Forumunda çıxışında bildirib.
Prezidentin köməkçisi qeyd edib ki, ATƏT-in həmsədrlərinin göstərdikləri səylər nəticə verməyib. Azərbaycan uğurlu əməliyyat nəticəsində ərazi bütövlüyünü bərpa edib.
“İşğaldan azad olunan ərazilərdə dağıntıların olacağını gözləyirdim, amma bu qədər acınacaqlı vəziyyətin olacağını gözləmirdim. Biz Ağdamı Qafqazın Xirosimasına bənzədirik”, - deyə Hikmət Hacıyev vurğulayıb.
O əlavə edib ki, Qarabağın Ermənistanın 30 il işğalı altında olması əbəs yerə gedən dövrdür: “Biz Qafqaz regionunun çiçəklənməsinə nail olsaq, bundan hamı faydalana bilər. Biz öz rolumuzu oynamağa hazırıq”.
Sayca 8-ci olan Bakı Forumunda qlobal məsələlərin müzakirəsi məqsədilə dünyanın 40-dan çox ölkəsinin sabiq dövlət başçıları, beynəlxalq və qeyri-hökümət təşkilatlarının nümayəndələri iştirak edirlər. VIII Qlobal Bakı Forumu bugün başa çatacaq.
