İnsult keçirən Xalq artisti Ənvər Həsənovun vəziyyəti ağır olaraq qalır.
Bu barədə Bakuplus.az -a aktyorun qızı Aytən Həsənova məlumat verib.
Bildirib ki, atamın vəziyyətində heç bir dəyişiklik yoxdur:
“Bir həftədir ki, evdədir. Müalicəsi evdə davam etdirilir. Həkim nəzarətindədir. Lakin səhhətində hər hansısa bir dəyişiklik yoxdur. Kefi bir gün yaxşı olur, bir gün yox. Heç kəsi tanımır. O öz aləmindədir. Danışa bilmir. Çox arıqlayıb”.
A.Həsənova atasının həkimləri ilə hər gün əlaqədə olduqlarını söyləyib:
“Həkimlərlə hər gün danışırıq. İki həkimi var. Atam yaşlı adamdır və ikinci dəfədir ki, insult keçirir. Həkimlər də nə isə deməkdə çətinlik çəkir. Hadisədən 1 ay keçir. Lakin hələ də hər hansısa dəyişiklik yoxdur.
Bəzi yalanları mənimlə danışmadan yazırlar. Sözüm budur ki, ən azı əlaqə saxlayın. Elə bilirlər k, atam yaxşı olduğu üçün biz onu xəstəxanadan çıxarmışıq. Xeyr, düşündük evə gələr, yadına nələrsə düşər. Evdə də qonaq kimidir. Təki sağalsın. Bizim də istəyimiz budur”.
Qeyd edək ki, Ənvər Həsənov Azərbaycan kino sənətinin inkişafındakı xidmətlərinə görə 18 dekabr 2000-ci ildə Azərbaycanın Əməkdar artisti, 1 avqust 2018-ci ildə isə Xalq artisti fəxri adlarına, 6 may 2023-cü ildə Azərbaycan mədəniyyətinin inkişafında xidmətlərinə görə Azərbaycan Respublikası Prezidentinin fərdi təqaüdünə layiq görülüb.
Ə.Həsənov “Yeddi oğul istərəm” filmində Cəlal, “Dərviş Parisi partladır” filmində Şahbaz, “Babək” filmində Tərxan, “Atları yəhərləyin” filmində Sirac, “Uşaqlığın son gecəsi” filmində Murad və başqa yaddaqalan obrazlar yaradıb.
Nəzrin Vahid
