Laçın Rayon Məhkəməsində yol qəzası törətməkdə təqsirləndirilən Zaman Əsədlinin (adı, soyadı şərtidir) cinayət işi üzrə məhkəmə istintaqı yekunlaşıb.
Bizim.Media xəbər verir ki, hakim Cavad İbrahimovun sədrliyi ilə keçirilən prosesdə hökm oxunub.
Məhkəmənin hökmü ilə o, 5 il 2 ay müddətinə azadlıqdan məhrum edilib və məhkəmə iclas zalında dərhal həbs olunub.
İttihama görə, hadisə 01 iyun 2025-ci il tarixdə saat 05:30 radələrində Laçın rayonu ərazisində qeydə alınıb.
Belə ki, şirkətlərdən birində çilingər vəzifəsində işləyən Zaman Əsədli MMC tərəfindən adına təhkim olunmuş “Mitsubishi L-200” markalı nəqliyyat vasitəsi ilə hərəkətdə olarkən tunelə giriş-çıxışın məhdudlaşdırılmasına baxmayaraq lazımi diqqət yetirmədiyindən bu maneələri görməyib həmin tunelə daxil olub.
O, tikintisi başa çatmayan, heç bir işıqlanması olmayan tuneldə nəqliyyat vasitəsini yüksək sürətlə idarə edərkən idarəetməni itirib. Bu zaman təqsirləndirilən şəxs maşını gəldiyi sürətlə həmin torpaq maneəyə zərblə çırparaq üzərindən keçib. Nəticədə avtomobildə olan dörd sərnişin - Quliyev Qulu Əlisahib oğlu, Məmnədov Şənürək Əbulla oğlu, İsrafilov Elnur Tofiq oğlu və Əliyev Raqif Şahin oğlu ağır dərəcəli bədən xəsarətləri alıblar.
Yaralılar Bərdə Rayon Mərkəzi Xəstəxanasına yerləşdirilib. Tibbi müdaxilələrə baxmayaraq, xəsarət alanlardan Raquf Əliyev dünyasını dəyişib.
Hadisədən sonra Zaman Əsədli saxlanılaraq cinayət məsuliyyətinə cəlb edilib və onun barəsində başqa yerə getməmək haqqında iltizam növündə qətimkan tədbiri seçilib.
