Dekabrın 14-də Azərbaycan Prezidenti İlham Əliyevlə NATO-nun Baş katibi Yens Stoltenberq arasında görüş olub. Bu barədə dövlət başçısının səhifəsində məlumat yerləşdirilib.
İlham Əliyev bildirib ki, Azərbaycan NATO-ya üzv 4 ölkənin təbii qaz təchizatçısıdır və gələcəkdə onların sayını artırmağa planlaşdırır.
Söhbət zamanı postmünaqişə dövründə regional məsələlər ətrafında fikir mübadiləsi aparılıb və Azərbaycanın Ermənistanla sülh sazişi üzrə danışıqlara hazır olduğu bildirilib.
Daha sonra tərəflərin birgə mətbuat konfransı keçirilib.
Zəngəzur dəhlizi ilə bağlı müzakirələr aparılıb. “Zəngəzur dəhlizinin hüquqi rejiminə gəlincə, o, Laçın dəhlizinin eynisi olmalıdır. Laçın dəhlizində gömrük yoxdur. Ona görə də, Zəngəzur dəhlizində də gömrük olmamalıdır. Əgər Ermənistan yük və insanlara nəzarət etmək üçün öz gömrük qurumlarından istifadədə israr etsə, onda biz Laçın dəhlizində eynisində israr edəcəyik”, - deyə İlham Əliyev vurğulayıb.
Alyansın Baş katibi qeyd edib ki, NATO tərəf tutmur və Azərbaycan ilə Ermənistan arasında münasibətlərin normallaşdırılması səylərini dəstəkləyir.
