Ölkədə uşaq ölümünün 71%-i şəhər əhalisi arasında qeydə alınıb

Azərbaycanda 1 yaşa qədər uşaq ölümünün 71%-i şəhər əhalisinin payına düşür. Bu haqda dekabrın 27-də AMEA məlumat verib.

Bu, Abşeronda əhalinin həddən artıq cəmlənməsi, çoxunun qeydiyyatı olmasa da, doğulan uşaqların qeydiyyatının aparılması, tibbi müayinəsinin həyata keçirilməsi, uşaq ölümü qeydiyyatının şəhərlərdə aparılması ilə bağlıdır.

Ötən il ölkə üzrə uşaq ölümünün 27,6%-i Bakı şəhərinin payına düşüb.

Məlumata əsasən, əvvəlki dövrlərdən fərqli olaraq hazırda 1 yaşa qədər uşaqlar əsasən bu səbəblərdən həyatlarını itirir:

hamiləlik dövründə analara lazımi səviyyədə tibbi xidmətin göstərilməməsi;

erkən yaşda ailə quran qızların sayının artması;

süni mayalanmanın geniş yayılması;

xəstəxanalarda rüşvət və digər mənfi halların davam etməsi;

kəndlərdə tibbi xidmətlərin aşağı səviyyəsi.

2020-ci ildə tənəffüs orqanlarının xəstəliklərindən 104 nəfər, anadangəlmə anomaliyalardan 62 körpə dünyasını dəyişib. Bəzi infeksiya və parazit xəstəlikləri hələ də əsas körpə ölümü səbəblərindən biri olaraq qalır.

Daha öncə, 2019-2020-ci illərdə ölkədə körpə ölümü əvvəlki illərlə müqayisədə ən aşağı səviyyədə qeydə alınıb.