Ali Məhkəmədə Masallı rayonunda tanışını qətlə yetirməkdə təqsirləndirilən Hüseynxan Cəfərovun kassasiya şikayətinə baxılıb.
Pravda.az xəbər verir ki, hakim Nazim Mövsümovun sədrliyi ilə keçirilən məhkəmə iclasında qərar elan olunub. Məhkəmə Hüseynxan Cəfərovun şikayətini əsassız sayaraq təmin etməyib.
İttihama görə, hadisə 2022-ci il iyunun 8-də Masallı şəhərində baş verib. 2002-ci il təvəllüdlü Hüseynxan Cəfərov həmin vaxt topdansatış anbarında birlikdə işlədiyi 1992-ci il təvəllüdlü Qadir Hüseynovla mübahisə edib. Mübahisəyə Qadir Hüseynovun dəfələrlə həm Hüseynxanın, həm də onun ailə üzvlərinin ünvanına nalayiq ifadələr işlətməsi və yersiz zarafatlar etməsi səbəb olub.
Son mübahisə zamanı Hüseynxan Cəfərov əsəbiləşərək həmkarına yumruq zərbəsi endirib, daha sonra onu yerə yıxaraq döyüb. Qadir Hüseynov aldığı xəsarətlərdən hadisə yerindəcə həyatını itirib.
Hadisə ilə bağlı Hüseynxan Cəfərova qarşı Cinayət Məcəlləsinin 126.3-cü maddəsi (qəsdən sağlamlığa ağır xəsarət yetirmə, ehtiyatsızlıqdan ölümə səbəb olma) ilə ittiham irəli sürülüb.
Lənkəran Ağır Cinayətlər Məhkəməsinin hökmü ilə o, 10 il müddətinə azadlıqdan məhrum edilib. Ali Məhkəmənin qərarına əsasən, bu hökm qüvvədə saxlanılıb və cəza ümumi rejimli cəzaçəkmə müəssisəsində icra olunacaq.
