İqtisadiyyat naziri Mikayıl Cabbarovun rəhbərlik etdiyi Azərbaycan nümayəndə heyəti noyabrın 3-dən Birləşmiş Ərəb Əmirliklərinin (BƏƏ) Dubay şəhərində səfərdədir. Səfər çərçivəsində bir sıra görüşlər keçirilib, sənədlər imzalanıb.
Azərbaycan Respublikası Hökuməti və Birləşmiş Ərəb Əmirlikləri Hökuməti arasında hökümətlərarası komissiyanın 8-ci iclası keçirilib. İclasda investisiya, ticarət, “yaşıl” enerji, kənd təsərrüfatı, qida təhlükəsizliyi, Kiçik və Orta Biznes, innovasiya, logistika, turizm, səhiyyə, elm sahələrində əməkdaşlığın genişləndirilməsi məsələləri müzakirə edilib. İclasın yekunlarına dair protokol imzalanıb.
Bundan əlavə, İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzi və “Dubai Future Foundation” arasında Anlaşma Memorandumu imzalanıb. Dördüncü Sənaye İnqilabı texnologiyalarının tətbiqi sahəsində əməkdaşlıq nəzərdə tutulub.
Noyabrın 4-də Azərbaycan İnvestisiya Holdinqi və “Dubai Logistics World” şirkəti arasında Anlaşma Memorandumu imzalanıb. Nazirin sözlərinə görə, sənəd ölkəmizin “Dünya Logistika Pasportu” təşəbbüsünə qoşulmasını və Azərbaycan şirkətlərinin bu mərkəzin təqdim etdiyi üstünlüklərə birbaşa çıxışını nəzərdə tutur.
Həmçinin nümayəndə heyəti “Dubay Expo-2020” ümumdünya sərgisində Azərbaycan Pavilyonunu ziyarət edib. Mikayıl Cabbarov öz Twitter səhifəsində sərgini davamlı inkişaf alətlərinin təqdimatı, biznesdə yeni istiqamətlər və etibarlı tərəfdaşlar qazanmaq üçün unikal platforma adlandırıb. Nazirin dediyinə görə, Azərbaycan Pavilyonu sərginin iştirakçıları tərəfindən maraqla qarşılanıb.
[URIS id=12276]
