“Qayınanam həmişə müsəlman gəlininin olmasını arzulayırdı”.
Sevgi bəzən ən gözlənilməz anlarda qarşımıza çıxır. Rəfiqə və Vlad Mironun hekayəsi də belədir.
Kaspi.аz bu cütlüyün tanışlıq hekayəsi ilə bağlı məqalə hazırlayıb.
Onlar İstanbulda qonşu olublar, ilk görüşləri isə film ssenarisini xatırladır:
"Biz Vladla İstanbulda tanış olduq. O, mənim qonşum idi. Təhsilimi bitirdikdən sonra bu şəhərdə yaşayıb işləmək üçün qaldım. Düzünü desəm onun görünüşü çox bəyənirdim. Bir gün mağazada Vladı gördüm. Satıcıdan ingilis dilində nəsə soruşmağa çalışsa da, qadın onu başa düşmürdü. Sonra kömək etmək qərarına gəldim. Biz belə tanış olduq. Vlada dedim ki, nəyəsə ehtiyac duyarsa, həmişə kömək etməyə hazıram. Sonra yaxınlıqdakı kafeyə getdik”.
Vlad Rəfiqə haqqında ilk təəssüratını belə xatırlayır:
“Rəfiqəni ilk gördüyümdə onun çox fərqli olduğunu hiss etdim. Nə rumın, nə də türk qızlarına bənzəyirdi. Əcnəbi olduğu hər halından bilinirdi. Həmçinin mənim orada tanıdığım kimsə yox idi, amma o, mənə kömək etdi. Tanımadığı birinə kömək etməyə çalışması mənə təsir etmişdi".
Vladın ilk görüşdə evlilik barədə danışması Rəfiqəni təəccübləndirib. İki həftə sonra Vlad ona evlilik təklifi edib, Rəfiqə də bu təklifə müsbət cavab verib.
Vlad Rəfiqənin ailə dəyərlərini çox bəyənib və onların tanışlıq dövrünün qısa olmasına baxmayaraq evlənməklə bağlı qərar verib. Ailələrinin dəstəyi ilə münasibətləri daha da möhkəmlənib.
Vlad Azərbaycan mətbəxini və adət-ənənələrini çox bəyənib. Onların ailələri arasında da çox oxşarlıqlar var.
Fərqli ölkədə olsa da, orada Rəfiqəni ailəsinin yanında kimi hiss etdirən məhz Vladın ailəsidir:
“Münasibətimizin dəstəkçilərindən biri də qayınanam olub. Vlad tərəddüd edərkən anası onun qərarını dəqiqləşdirməsində rol oynayıb. Qayınanam hər zaman müsəlman gəlini olmasını arzulayıb. O, mənə çox dəstək olur. Hər zaman mənim tərəfimi tuturlar. Vlad tək övlad olduğu üçün məni qızları kimi görürlər. Anam və atam qədər sevgi dolu yanaşırlar. Vlad mənim xətrimə dəydikdə onunla danışırlar, məni haqlı çıxarırlar”.
Mübahisəyə səbəb olan xasiyyət bəzən də ən sevilən olur. Cütlüyümüzdə də belə imiş:
“Vlad Avropa kişilərindən çox fərqlənir. Məsələn, qısa və açıq geyimdən xoşu gəlmir. Amma bəzən bu qədər keçmiş düşüncəli olmasını bəyənmirəm. Elə bilirəm ki, Vlad da azərbaycanlıdır. Vlad deyir ki, qadın axşam çölə çıxmaz, zamanında evə qayıdar. Arada olur ki, bunlara görə mübahisə edirik”.
Vladın bizə oxşayan tək xasiyyəti mühafizəkarlığı deyil. O da yoldaşına maşın sürməyi öyrədərkən səbirsiz davranır:
“Mənim Rəfiqə ilə daha çox mübahisəm maşın sürmək üstündə olur. Burada bütün qadınlar maşın sürür. İstəyirəm o da öyrənsin. Bir az ehtiyat edir, çəkinir deyə bəzən buna görə mübahisə edirik. Rəfiqə mənə deyir ki, bu xüsusiyyətlərinə görə azərbaycanlılara çox bənzəyirsən”.
[gallery link="file" size="full" ids="217670,217669,217672,217673,217671,217674,217668"]
