Azərbaycan çempionu adını dəfələrlə qazanmış ağır atlet Asxab Kalayev 44 günlük Vətən müharibəsi ilə bağlı xatirələrini bölüşüb.
Hazırda o, “Neftçi İdman Klubu” İctimai Birliyində ağır atletika üzrə baş məşqçi, həmçinin Azərbaycan Deflimpiya Komitəsinin beynəlxalq əməkdaşlıq və ictimaiyyətlə əlaqələr şöbəsinin müdiridir. Müharibə dövründə isə artilleriya komandiri olub.
İdman.biz Vətən müharibəsi iştirakçısı, ağır atlet Asxab Kalayevdən müsahibə alıb:
– Vətən müharibəsində iştirakınız necə baş verdi?
– Müharibə başlayanda mən Tərtər rayonunda artilleriya qoşunlarında xidmət edirdim. Demək olar ki, ilk dəqiqələrdən döyüşlərə qoşuldum. Mən artilleriya komandiri idim.
– Müharibə sizin üçün nə vaxt başa çatdı?
– Paşinyan kapitulyasiya aktına imza atanda. O günü heç vaxt unutmayacağam. Həmin an yaşadığımız sevinci, hissləri sözlə ifadə etmək mümkün deyil – bunu yalnız yaşamaq lazımdır. Biz əvvəlcə Suqovuşandan, sonra Ağdərədən keçib Murovdağa tərəf irəlilədik. Qələbə xəbərini də orada eşitdik.
– Beş il keçdikdən sonra yaddaşınızda hansı anlar daha çox iz buraxıb?
– Təəssüf ki, müharibə təkcə qürur və sevinc dolu anlardan ibarət deyil. Mənimlə çiyin-çiyinə döyüşən şəhidlərimizi heç vaxt unuda bilmərəm. Məhz bu xatirələr səbəbindən idmana qayıtmağım çox vaxt aldı. Halbuki müharibəyə qədər həm gənclər, həm də böyüklər arasında dəfələrlə Azərbaycan çempionu və kubok qalibi olmuşdum.
– Ola bilərdi ki, məşqlər sizə bu xatirələrdən qurtulmaqda kömək etsin…
– Bilirsiniz, bədən yaraları vaxt keçdikcə sağalır, amma ruh yaraları heç vaxt. Mən təxminən dörd il məşqlərə qayıda bilmədim – daxili boşluq hiss edirdim, heç bir motivasiyam yox idi. Yalnız bu ilin əvvəlində federasiyanın yeni rəhbərliyi ilə söhbətdən sonra yenidən məşqlərə başladım.
– Qarşıdakı planlarınız nələrdir?
– Noyabrda keçiriləcək Azərbaycan kubokunda iştirak etməyi düşünürəm. Siz zəng edəndə məşqi təzə bitirmişdim.
– Sizi bu məqsəddən nə dayandıra bilər? Ümid edirik ki, ağır atletikamızın əsas problemlərindən biri – dopinq deyil…
– Əlbəttə ki, yox (gülür)! Amma karyeram boyu bu problemi çox gördüm. Bəziləri dopinq qəbul edirdi, amma cəzanı bütün komanda çəkirdi. Bu, çox ədalətsiz idi. Mənim kimi heç vaxt qadağan olunmuş preparatlardan istifadə etməyən idmançılar da Avropa və dünya çempionatları kimi ən önəmli yarışlardan kənarda qalırdı. Şükürlər olsun ki, indi yeni rəhbərlik dövründə dopinq məsələsi kökündən aradan qaldırılır. AMADA da (Antidopinq Agentliyi) bizi mütəmadi olaraq yoxlayır.
Vüqar Vüqarlı
