Bakıda narkotik vasitələrin satışı və kultivasiyası ilə məşğul olan şəxslər saxlanılıb. Bu barədə oktyabrın 13-də DİN-dən məlumat verilib.
Binəqədidə narkotik satan qadın tutulub. Onun əlindəki çantaya baxış zamanı 1 kiloqram 92 qram heroin, 115 qram metamfetamin, 1 ədəd elektron tərəzi və bank kartları aşkar olunaraq götürülüb. Araşdırma zamanı bu şəxsin narkotik vasitələri sosial şəbəkələrdə tanış olduğu xarici vətəndaşdan satmaq məqəsədi ilə onlayn yolla aldığı məlum olub.
Digər bir əməliyyat zamanı isə yaşadığı evin həyətindən narkotik tərkibli bitkilərin kultivasiyası ilə məşğul olan əvvəllər məhkum olunmuş şəxs saxlanılıb. Onun Fatmayı qəsəbəsində yerləşən evinin həyətinə baxış zamanı ümumi çəkisi 74 kiloqram olan çətənə bitkisi aşkar edilib.
2021-ci il yanvarın 1-dən oktyabrın 1-dək narkotiklərin qanunsuz dövriyyəsinə qarşı aparılan tədbirlər nəticəsində 6 420 fakt aşkarlanıb. Ümumilikdə 2 ton 773 kiloqram narkotik, 230 kiloqram psixotrop maddə aşkar olunaraq dövriyyədən çıxarılıb.
Video: YouTube Baş Narkotiklərlə Mübarizə İdarəsi
