Rusiya və Ukrayna arasında baş verən hadisələr ölkəmizin xurma ixracına birbaşa təsir göstərir. Bu barədə 18 mart tarixində Sputnik Azərbaycan reportaj hazırlayıb.
Məlumatda qeyd edilib ki, bu iki ölkə Azərbaycan xurmasının ən böyük idxalçılarındandır. Hazırda onlar arasında yaranan gərginlik bu məhsulların satışı ilə məşğul olanlara böyük zərər vurub. Yeni bazarın tapılmaması isə bu sahədə ciddi problemlər yarada bilər.
Sahibkarların sözlərinə əsasən, hazırda sözügedən ölkələrə xurma ixrac etmək, ya ümumiyyətlə, mümkün deyil, ya da Rusiya valyutasının dəyər itirməsinə görə sərf etmir.
Göyçaydan olan sahibkar Coşqun Yusifov söyləyib ki, tonlarla xurma soyuducu anbarlarda qalıb tələf olur: “Bu min bir əziyyətlə becərilən məhsulla bağlı külli miqdarda vəsaitin itirilməsi deməkdir. Rusiya və Ukraynadan başqa, hələ ki böyük miqdarda xurma satmaq üçün bazarımız yoxdur”. “Hər il rublun məzənnəsi sabit olurdu, sahibkarlar da malını rahat satırdı. Hazırda iş adamları məhsulu Rusiya bazarına göndərə bilsə də, əldə olunan gəlir yol, soyuducu və digər xərcləri ödəmir və sahibkarlara külli miqdarda zərər dəyir”, - deyə o əlavə edib.
C.Yusifovun dediyinə görə, məhsulu yerli bazarda satmaq sahibkarlar üçün əlverişli deyil: “Azərbaycanda soyuducu anbarlarda olan məhsullara heç bir alıcı yoxdur”.
Qeyd edək ki, ölkəmizdə ildə 200 min tondan artıq xurma istehsal olunur. Təkcə ötən il 174 min ton xurmanın ixracından 126 milyon dollar gəlir əldə edilib. 2022-ci ilin ilk ayı ərzində xurma qeyri-neft sektoru üzrə ən çox ixrac olunan məhsullar sırasında ikinci yerdə qərarlaşıb.
