Sabah 14 fevral – Müqəddəs Valentin və ya Sevgililər günüdür. Dünyanın bir çox ölkəsi kimi Azərbaycanda da bu günü qeyd edənlər var. Bu günün sevən bir gəncə neçəyə başa gələcəyini öyrənmək üçün və ən çox təqdim edilən və sevilən hədiyyənin gül olduğunu nəzərə alaraq, Bakuplus.az-ın əməkdaşı paytaxtda yerləşən bir neçə gül dükanına baş çəkib.
İlk daxil olduğumuz dükanda səssizlikdir. Bir-birindən gözəl gül dəstələri hazırlanaraq sıraya düzülüb. Lakin hələ ki, müştəri qıtlığı müşahidə olunur.
Məyus halda bu dükandan ayrılıb, digərinə daxil oluruq. Burada sıxlıq müşahidə olunur. Hətta əlamətdar gün ilə əlaqədar simvolik buketlər də hazırlanıb. Satıcılar gül qiymətlərinin sabit qaldığını, alıcı itirməmək üçün sabah da qiymətləri dəyişdirməyəcəklərini deyirlər.
Digər gül salonunun birində 14 fevral ilə əlaqədar gül alanların sayında artım müşahidə olunduğunu dedilər. Satıcıların sözlərinə görə, dünyanın hər yerində olduğu kimi bizdə də demək olar ki, eyni hədiyyələr alınır. Cütlüklər bu bayramda gülə daha çox üstünlük verirlər.
Gül salonlarında ürəyiniz istədiyi rəngdə cürbəcür güllər var, qiymətləri də fərqlənir. Belə ki, qızılgül dörd-beş, zanbaq üç, liliya on beş manatadır.
Qızılgüldən hazırlanan orta ölçüdə buketlər 130-150, kiçik ölçüdə olanı isə 65 manatadır. Səbətdə hazırlanan gül buketi 140, qutudakı güllər isə 80 manatadır. Satıcı qiymətlərin gülün növünə və sayına görə dəyişdiyini qeyd edir. Deyir ki, qızılgüldən hazırlanan gül dəstəsi daha baha başa gəlir. Zanbaq buketinin qiyməti isə 40-50 manatdır.
Hədiyyə ancaq oyuncaq ayılardır. Onların da qiyməti 80 manata qədərdir.
Satıcılardan biri bildirir ki, müxtəlif rəngə boyanan, bərbəzəkli hazırlanan və qeyri-adi üslubda dizayn edilən güllərə maraq daha çoxdur: “İndi böyük güllərə tələbat artıb. 101, 200, hətta 1001 qızılgül alan var”.
Bəzi alıcılar qiymətlərin baha olduğundan şikayətlənir. Satıcılar da alıcı azlığını dilə gətirir…
Hər zaman sevin və sevilin…
Nəzrin Vahid
