Rumıniyada enerji bazarının aparıcı şirkətlərindən biri olan "SOCAR România"nın baş direktoru Ramil Əsədulzadə ciddi qalmaqalla üz-üzə qalıb. Nüfuzlu rumın nəşri "Cancan" yazır ki, o, şirkətin insan resursları direktoru Bibiana Konstantinlə gizli münasibətdədir.
Mətbuatda yayılan məlumata görə, 37 yaşlı Əsədulzadə Buxarestdəki SOCAR PETROLEUM SA ofisini tərk edərək xidməti Audi Q7 avtomobili ilə İKEA mərkəzinin (Bəneasa rayonu) dayanacağına gedib. Orada onu xidməti Skoda Kodiaq ilə gələn Bibiana Konstantin gözləyirmiş. Qısa fasilədən sonra Konstantin Əsədulzadənin avtomobilinə əyləşib. Jurnalistlərin müşahidəsinə görə, o, tələsikliyindən öz maşınında şərab şüşəsi olan bir paketi unudub və bir neçə dəqiqə sonra geri qayıdaraq götürüb. Daha sonra cütlük Club Snagov-a yollanıb və burada terrasda üç saatdan çox vaxt keçirib. Görüş şərab, səmimi söhbətlər və açıq-aşkar şəxsi jestlərlə müşayiət olunub. Ardınca isə onlar klubun otel otaqlarından birinə qalxaraq təxminən beş saat orada qalıblar.
Məkanı tərk edərkən Əsədulzadə otağın açarını resepsiyona qaytarıb, Konstantin isə oteli gözdən yayınaraq tərk etməyə çalışıb. Lakin dayanacağa doğru hərəkət edərkən artıq gizlənməyiblər – əl-ələ tutaraq və öpüşərək ictimaiyyət qarşısında münasibətlərini aşkar ediblər. Buxarestə dönüşdə isə Konstantin arxa oturacaqda gizlənmək əvəzinə ön oturacaqda, Əsədulzadənin yanında əyləşib.
Nəşr qeyd edir ki, Əsədulzadə ailəlidir və həyat yoldaşı ilə birlikdə Buxarestdə, Amerika məktəbinin yaxınlığında yaşayır. İndi o, təkcə Bibiana ilə bağlı epizodu deyil, həm də keçmiş şəxsi katibəsi Ramona ilə bağlı başqa iddiaları da izah etməli olacaq. Xatırladaq ki, Ramona hazırda bir övlad böyüdür.
Karyera və şübhəli fəaliyyətlər
Əsədulzadə 2023-cü ildə SOCAR PETROLEUM SA-nın baş direktoru təyin olunub. Bundan əvvəl şirkətin Rumıniya üzrə maliyyə direktoru vəzifəsində çalışıb. Onun müqaviləsi 2027-ci ilin yanvarına qədər qüvvədədir. Lakin Cancan yazır ki, yaranmış vəziyyət rəhbərlikdə dəyişikliklərə səbəb ola bilər.
Eyni zamanda, iddialara görə, son illərdə Əsədulzadə JETFLY HUB Ploeşti şirkəti vasitəsilə tanınmış biznesmen Dan Berendel ilə neft əməliyyatlarında iştirak edib. JETFLY HUB SRL (Dubayda qeydiyyatdan keçmiş ofşor) üzərindən həyata keçirilən bu əməliyyatların 100 milyon avrodan çox vergidən yayınma sxemi ilə bağlı olduğu və hazırda araşdırıldığı qeyd olunur.
Bibiana Konstantinin keçmişi
O, SOCAR-a 2022-ci ilin iyununda qoşulub. Buna qədər Electrica şirkətində kadrlar şöbəsinin rəhbəri, daha əvvəl isə Chimica qrupunda və iş adamı Ştefan Vuzenin sahibi olduğu Serviciile Comerciale Române şirkətində oxşar vəzifələrdə çalışıb.
