Sosial şəbəkələrdə saxta elanlar yerləşdirərək və özlərini təhlükəsizlik mütəxəssisi kimi təqdim edən dələduz qrupun 4 üzvü Daxili İşlər Nazirliyi tərəfindən ifşa olunub.
İnsanoid.com xəbər verir ki, saxlanılan şəxslər əvvəllər də eyni cinayətlərə görə məhkum olunmuş Şahin Rəcəbov, Aqşin Bədəlov, İlkin Niyazov və Cəfər Cəfərovdur.
Araşdırmalar nəticəsində məlum olub ki,
Aqşin Bədəlov və İlkin Niyazov sosial şəbəkələrdə və müxtəlif elan saytlarında başqalarına məxsus bahalı mobil nömrə, avtomobil və evləri öz əmlakları kimi təqdim edərək ucuz qiymətə satmaq adı ilə vətəndaşları aldadıblar.
Cəfər Cəfərov isə müəssisələr və iaşə obyektləri ilə “WhatsApp” vasitəsilə əlaqə saxlayaraq özünü brend əşyaların topdansatış vasitəçisi kimi qələmə verib, vətəndaşlardan beh adı ilə pul toplayıb.
Şahin Rəcəbov isə xaricdə olduğu müddətdə Azərbaycandakı şirkətlərlə əlaqə saxlayaraq özünü elektron poçt və sayt idarəedən şirkətin rəhbəri kimi təqdim edib, ödəniş tələb edərək onlayn xidmətlərin dayandırılacağı ilə hədələyib və bu yolla qanunsuz gəlir əldə edib.
Faktla bağlı Cinayət Məcəlləsinin müvafiq maddələri ilə iş başlanıb.
Məhkəmənin qərarı ilə Şahin Rəcəbov və Aqşin Bədəlov barəsində həbs, digərləri haqqında isə alternativ qətimkan tədbiri seçilib.
Hadisə ilə bağlı DİN tərəfindən video material təqdim olunub.
