Rusiya ilə Ukrayna arasında baş verən hadisələr Azərbaycanın tikinti sektoruna da öz təsirini göstərir. Tikinti bazarında əsas mallardan biri hesab edilən taxtanın qiyməti bahalaşıb.
Müharibədən əvvəl taxtanın kubu 450 manat idi. Hazırda isə 30 manat artaraq 480 manat olub.
Sahibkarların sözlərinə görə, taxta bazarına material əvvəlkindən az gəlir. Gələn vaqonlara doldurulmuş taxtalar da, əsasən, müharibədən əvvəl yüklənmiş materiallardır.
Məsələ ilə bağlı Trend-ə əmlak məsələləri üzrə ekspert Ramil Osmanlı bildirib ki, tikinti materiallarının qiymətinin artmasının əsas səbəbi rublun dəyər itirməsinə görədir.
"Rusiyada sahibkarlar rublun məzənnəsinin düşməsinə görə ehtiyatlı davranırlar. Buna görə də ixracı azaldırlar. İdxalın azalması fonunda tələbin yüksək olması qiymətlərin artmasına səbəb olur. Taxtadan başqa, dam örtükləri, döşəmə örtükləri, dəmir və dəmir məmulatları, armaturun qiymətləri də artacaq" - deyə ekspert bildirib.
