2020-ci il sentyabrın 27-də Ermənistan silahlı qüvvələrinin cəbhəboyu törətdiyi genişmiqyaslı təxribatlara cavab olaraq Azərbaycan Ordusu “Dəmir Yumruq” adlanan əks-hücum əməliyyatına başlayıb. 44 gün davam edən Vətən müharibəsi nəticəsində təxminən otuzillik işğala son qoyulub və Azərbaycanın ərazi bütövlüyü bərpa edilib. Möhtəşəm Zəfər, Müzəffər Ali Baş Komandan İlham Əliyevin rəhbərliyi ilə qazanılıb və bu uğur tariximizə qızıl hərflərlə yazılıb.
İnsanoid.com Vətən müharibəsinin 23-cü gününün xronikasını təqdim edir:
– Cəbrayıl rayonunun Soltanlı, Əmirvarlı, Maşanlı, Həsənli, Əlikeyxanlı, Qumlaq, Hacılı, Göyərçinveysəlli, Niyazqullar, Keçəl Məmmədli, Şahvəlli, Hacı İsmayıllı və İsaqlı kəndləri Azərbaycan Ordusu tərəfindən azad edilib. Bu barədə Prezident İlham Əliyev X hesabında məlumat verib.
– Ermənistan silahlı qüvvələri Azərbaycanın yaşayış məntəqələrini və döyüş mövqelərini ağır artilleriya ilə atəşə tutub. Bu barədə Prezident İlham Əliyev rəsmi X hesabında məlumat yayıb.
– Azərbaycan Prezidenti İlham Əliyev Rusiyanın TASS informasiya agentliyinə videomüsahibə verib.
– Prezident İlham Əliyev Türkiyə Böyük Millət Məclisinin Sədri başda olmaqla nümayəndə heyətini qəbul edib.
– Müdafiə Nazirliyinin məlumatına görə, cəbhənin Ağdərə-Ağdam, Füzuli-Hadrut-Cəbrayıl istiqamətlərində və Araz çayı boyu düşmənin müqavimət göstərmə cəhdlərinə qarşı döyüş əməliyyatları davam edib. Azərbaycan Ordusu düşmənin canlı qüvvəsini və hərbi texnikasını, o cümlədən 2 ədəd T-72 tankını, 2 ədəd BM-21 “Qrad” qurğusunu, 1 ədəd D-30 və 1 ədəd D-20 haubitsasını və 11 avtomobilini sıradan çıxarıb.
– Cəbrayıl və Füzuli istiqamətində düşməndən ələ keçirilən hərbi qənimətlərin videogörüntüləri yayılıb.
– Ermənistan silahlı qüvvələrinin yaşayış məntəqələrimizi ağır artilleriya və raket sistemlərindən atəşə tutması nəticəsində 61 mülki şəxs həlak olub, 282 nəfər yaralanıb. 1846 ev, 90 çoxmənzilli bina və 341 mülki obyekt yararsız hala düşüb. Bu barədə Baş Prokurorluq məlumat yayıb.
– Düşmənin mülki əhalini atəşə tutması nəticəsində Ağdam rayonunda üç nəfər, o cümlədən Azərbaycan Televiziyasının əməkdaşı xəsarət alıb.
