38-ci gün (3 noyabr 2020-ci il) cəbhədə baş verən mühüm hadisələr:
• Döyüşlər əsasən Ağdərə, Xocavənd, Zəngilan və Qubadlı istiqamətlərində davam edərək düşmənin xeyli sayda canlı qüvvəsi və hərbi texnikası məhv edildi. Sıradan çıxarılan texnikalar arasında dörd ədəd BM-21 “Qrad” yaylım atəş sistemi, bir ədəd KUB zenit-raket kompleksi, doqquz müxtəlif tipli top və iki sursatla dolu yük maşını yer aldı.
• Prezident İlham Əliyevlə Rusiya Prezidenti Vladimir Putin arasında telefon danışığı baş tutdu.
• Ermənistanın cəbhədə uçuş həyata keçirməyə cəhd göstərən taktiki pilotsuz uçuş aparatı Azərbaycan hava hücumundan müdafiə qüvvələri tərəfindən məhv edildi.
• Zəngilan rayonu istiqamətində Ermənistan ilə dövlət sərhədində düşmənin kəşfiyyat-diversiya qrupu zərərsizləşdirildi.
• Müdafiə Nazirliyi Xankəndi yaxınlığında yerləşən iki sursat anbarının məhv edilməsinin videogörüntüsünü yaydı.
• Cəbhənin Xocavənd istiqamətindəki döyüşlərdə Ermənistanın 2-ci motoatıcı alayının şəxsi heyəti və döyüş texnikası ağır itkilərə məruz qaldı.
• Ağdərə, Ağdam və Xocavənd istiqamətində hücuma keçməyə çalışan düşmən ağır itkilər verərək geri çəkilməyə məcbur edildi.
• Düşmənin snayper qrupu və zirehli tank taborunun komandiri məhv edildi.
• ANAMA, Ermənistanın mülki əhaliyə qarşı istifadə etdiyi qadağan olunmuş fosforlu mərmiləri partlayış yolu ilə zərərsizləşdirdi. Bu əməliyyatın foto və videoreportajı AZƏRTAC tərəfindən yayımlandı.
• Ermənistanın ağır artilleriya və raket sistemləri ilə Azərbaycan yaşayış məntəqələrinə hücumları nəticəsində sentyabrın 27-dən noyabrın 3-dək 91 mülki şəxs həlak oldu, 405 nəfər yaralandı, 2488 ev, 97 yaşayış binası və 461 mülki obyekt yararsız hala düşdü. Bu barədə Baş Prokurorluq məlumat verdi.
