Abşeron rayonunun Xırdalan şəhərində həyat yoldaşını qətlə yetirməkdə şübhəli bilinən şəxs saxlanılıb. Bu barədə Baş Prokurorluq oktyabrın 8-də məlumat yayıb.
Hadisə oktyabrın 7-si saat 11 radələrində baş verib. Sənan Umarov 22 yaşlı həyat yoldaşını aralarında yaranmış mübahisə zamanı bıçaqlayaraq öldürməkdə şübhəli bilinir.
Faktla bağlı “qəsdən adam öldürmə” maddəsi ilə cinayət işi başlanılıb.
Sentyabrın 30-da polisin həyat yoldaşını şöbədə öldürməsi sosial şəbəkələrdə geniş müzakirə olunub. Xidmətdə olan əməkdaş uşaqların gözü qarşısında silahdan atəş açaraq arvadını qətlə yetirib. Onun 14 ildən 20 ilədək və ya ömürlük azadlıqdan məhrum edilməsi gözlənilir.
Baş Prokurorluğun məlumatına əsasən, bu ilin ilk 6 ayı ərzində qeydə alınmış adam öldürmə cinayətləri nəticəsində 33 qadın qətlə yetirilib.
Vətəndaşlar qadına qarşı zorakılıq halları ilə üzləşdikdə Baş Prokurorluğun “961” Çağrı Mərkəzinə müraciət edə bilərlər.
