Üzümçülük və Şərabçılıq Elmi-Tədqiqat İnstitutu tərəfindən “Gəncəvi” yeni hibrid üzüm sortunun və digər yerli üzüm sortlarının dequstasiyası keçirilib. Bu barədə 19 avqust tarixində Kənd Təsərrüfatı Nazirliyi məlumat verib.
Dequstasiya prosesində üzüm sortlarının dad, əmtəə görünüşü və digər keyfiyyət göstəricilərinə baxış keçirilib və onlardan alınan şərabların xüsusiyyətləri qiymətləndirilib. Tədbirdə həmçinin müxtəlif növ şərablar, üzüm kompotu, şirəsi və bəhməzi, sirkə, abqora, kişmiş, mövüc, mürəbbə, yarpaq kimi məhsullar nümayiş etdirilib.
İnstitutda yeni üzüm sortlarının yaradılması məqsədilə hibridləşdirmə nəticəsində 40-dan çox üzüm sortları yaradılıb. Sortlardan 6-sı dövlət reysterinə daxil edilib, 5 yeni sort isə sınağa təqdim olunub.
Son tədqiqatlar göstərib ki, Azərbaycanda vaxtilə 600-ə yaxın üzüm sortları əkilib-becərilib. Bunun 400-ə qədərini yerli üzüm sortları təşkil edir.
Azərbaycanda 2021-ci ilin yanvar-iyul aylarında 7,7 min ton üzüm yığılmışdır. Ölkəmizdə üzüm istehsalı üzrə seçilən rayonlar sırasına Şəmkir, Cəlilabad, Tovuz, Şamaxı və Samux daxildir.
