Son günlərdə Kəlbəcərdə yerləşən "İstisu" mineral su zavodunun yaxınlığındakı su çıxışının qəsdən bağlanması ilə bağlı sosial şəbəkələrdə müxtəlif iddialar yayılıb.
İddialara əsasən, guya ərazidə sakinlərin əvvəllər sərbəst şəkildə istifadə etdiyi mineral su çıxışının ləğv edildiyi və suyun verilişinin dayandırıldığı bildirilir.
İnsanoid.com xəbər verir ki, sözügedən iddialar həqiqəti əks etdirmir.
Məsələ ilə bağlı yayılan məlumatların əksinə olaraq, zavodun yaxınlığında yerləşən su çıxışında mütəmadi olaraq texniki və profilaktik işlər aparılır. Su xətti hər həftə müəyyən müddətə bağlanaraq boruların və çıxış hissəsinin təmizlənməsi, texniki vəziyyətinin yoxlanılması və zəruri profilaktik tədbirlərin görülməsi təmin edilir. İşlər yekunlaşdıqdan sonra su xətti yenidən istifadəyə verilir.
Sosial şəbəkələrdə yayılan görüntülərdə borunun yerində olmaması da məhz bu texniki proseslə bağlıdır. Belə ki, təmizlik və profilaktik işlər zamanı boru müvəqqəti olaraq çıxarılır, işlər başa çatdıqdan sonra isə yenidən əvvəlki yerinə quraşdırılır.
Bu səbəbdən yalnız bir neçə dəqiqəlik və ya müəyyən zaman kəsiyində çəkilmiş görüntülər əsasında suyun tamamilə bağlandığını və ya çıxışın ləğv edildiyini iddia etmək düzgün deyil. Mövcud vəziyyəti ümumi prosesdən ayıraraq təqdim etmək ictimaiyyətdə yanlış təsəvvür yaradır və faktların təhrif olunmasına səbəb olur.
Başqa sözlə, söhbət mineral su çıxışının birdəfəlik bağlanmasından deyil, mütəmadi həyata keçirilən texniki-profilaktik tədbirlər çərçivəsində su xəttinin müvəqqəti dayandırılmasından gedir.
Su xəttində aparılan müntəzəm texniki işlərin mərhələlərini və proses başa çatdıqdan sonra mineral suyun yenidən verilişinin bərpa olunduğunu əyani şəkildə nümayiş etdirən görüntüləri də təqdim edirik.
