Paytaxtın Nərimanov rayonunda yerləşən 212 saylı orta məktəbin şagirdi cinsi qısnamaya məruz qalıb. Həmin hadisənin görüntüləri məktəbin nəzarət kamerasına düşüb.
Bu haqda oktyabrın 28-də Avtosfer.az xəbər yayıb.
Məktəblinin atasının sözlərinə görə, 11 yaşlı qızı dərs bitdikdən sonra məktəbin dəhlizində onun gəlməsini gözləyib. Bu zaman naməlum şəxs onun qızını cinsi qısnamaya məruz qoyub.
Məktəblinin atası məktəbə çatan vaxt həmin şəxsi polisə təhvil vermək üçün onu zərərsizləşdirməyə çalışıb. Bu zaman ətrafda olan insanlar onların dava etdiyini düşünərək şübhəlini xilas ediblər. Həmin şəxs vəziyyətdən çıxaraq qaçıb gedib.
Məsələ ilə bağlı dərhal Daxili İşlər Nazirliyinin 102 qaynar xəttinə məlumat verilib. Bundan sonra atanın izahatı alınıb.
Daxili İşlər Nazirliyindən bildirilib ki, məsələ ilə bağlı bütün zəruri tədbirlər görülür. Həmin şəxsin müəyyən olunması istiqamətində əməliyyat-axtarış qrupu çalışır.
