8 yaşlı uşaq qidalanma vərdişlərinə görə görmə qabiliyyətini tamamilə itirdi.
İsnanoid.com xarici mənbələrə istinadən məlumat verir ki, Malayziyada baş verən bu hadisədən sonra mütəxəssislər valideynlərə yenidən xəbərdarlıq ediblər.
Məlum olub ki, uşaq körpəlikdən yalnız hazır və qablaşdırılmış qidalarla qidalanıb. Onun əsas qida mənbəyi nuggets, kolbasa və biskvitlər olub. Həkimlər bu cür qidaların görmə sinirlərinə ciddi zərər verdiyini və A vitamininin çatışmazlığının görmə itkisinə səbəb olduğunu qeyd ediblər.
A vitamini göz sağlamlığı üçün olduqca vacibdir, çünki bu vitamin rodopsin adlı zülalın istehsalına kömək edir. Rodopsin zülalı gözün zəif işıqda görməsini təmin edir. Bu zülalın çatışmazlığı isə optik sinirlərin zəifləməsinə və tədricən görmə qabiliyyətinin itməsinə gətirib çıxarır.
Mütəxəssislər qablaşdırılmış, emal olunmuş və fast food tipli qidaların vitamin çatışmazlığına səbəb olduğunu vurğulayır və valideynləri uşaqların balanslı qidalanmasına xüsusi diqqət yetirməyə çağırır.
Bu kimi hallar artıq təkcə Malayziyada deyil, İngiltərə və ABŞ kimi ölkələrdə də müşahidə olunur. Məsələn, İngiltərədə yalnız kartof qızartması ilə qidalanan bir uşaqda A vitamini çatışmazlığı aşkar edilib. Bu, valideynlər üçün ciddi bir xəbərdarlıq olaraq qiymətləndirilir.
