Müəllimlərin ümumi təhsil müəssisələrinə işə qəbulu üzrə müsabiqənin müsahibə mərhələsinin nəticələri açıqlanıb. Bu barədə İnsanoid bu gün, 25 avqust tarixində İnsan Resursları Mərkəzinə istinadən xəbər verir.
Nəticələr barədə məlumat namizədlərin şəxsi səhifələrinə göndərilib. 4300 nəfər 9-18 avqust tarixlərində təşkil olunan müsahibələrdə uğur qazanıb.
Onlar 29 avqust saat 18:00-dək zəruri sənədləri (şəxsiyyəti təsdiq edən sənədin, ali və ya orta ixtisas təhsili haqqında sənəd və ona əlavənin surəti, əmək kitabçasının əsli (olduğu təqdirdə), 4 ədəd 3x4 formatında fotoşəkil, sağlamlıq haqqında arayış, kadrlar uçotunun şəxsi vərəqəsi, şəxsi səhifədə işə qəbulun nəticəsinə dair çıxarış) aidiyyəti yerli təhsili idarəetmə orqanına təqdim etməlidirlər.
Çıxarışı aidiyyəti yerli təhsili idarəetmə orqanı tərəfindən təsdiq olunmuş namizədlərin işə qəbulu rəsmiləşəcək. Namizədlərə sənədlərini təqdim etdikdən sonra şəxsi səhifələrinə daxil olaraq, çıxarışının təsdiq olunduğunu yoxlamaq tövsiyə edilir.
Çıxarışını təsdiq etməyən, müsahibə mərhələsində uğur qazandıqdan sonra tutduğu vakant yerdən imtina edən şəxslər növbəti turlarda iştirak edə bilməyəcəklər.
Müsahibə mərhələsində uğur qazanmayan namizədlər 26 avqust saat 11:00-dan etibarən şəxsi səhifələrinə daxil olaraq, apellyasiyaya müraciət edə bilərlər. Apellyasiya müraciətlərinin qəbulu 28 avqust saat 11:00-da başa çatacaq.
Müsahibələr onlayn formatda təşkil olunacaq. Bunun üçün namizədlər şəxsi səhifələrinə daxil olaraq, müsahibə linkinin göndəriləcəyi elektron poçt ünvanlarını müvafiq xanaya yazaraq iştiraklarını təsdiq etməlidirlər.
Qeydiyyat zamanı elektron poçt ünvanını düzgün qeyd etməyən və elektron ərizəsini təsdiqləməyən namizədlərin apellyasiya müraciəti təmin olunmayacaq.
Onlayn apellyasiya müsahibələrinin keçiriləcəyi tarix barədə əlavə məlumat yaxın günlərdə veriləcək.
