Moldova Prezidenti Maya Sandu yaxın vaxtlarda onun ölkəsində Rusiya tərəfindən dövlət çevrilişi təşkil oluna biləcəyi barədə xəbərdarlıq edib. Bu barədə Apa 13 fevral tarixində xəbər verib.
Prezident Sandu bu gün mətbuat konfransında deyib:
"Plana zorakılıq hərəkətləri həyata keçirmək, hökumət binalarına hücum etmək və girov götürmək üçün mülki geyimdə kamuflyaj edilmiş, hərbi təlim keçmiş təxribatçıların iştirak edəcəyi aksiyalar daxildir. Plana görə, etiraz kimi maskalanan zorakı hərəkətlər Kişinyovda hakimiyyəti dəyişikliyə məcbur edəcək".
Moldova Prezidenti oliqarx İlan Şorun partiyasının payızda təşkil etdiyi etiraz aksiyalarını xatırladaraq, Rusiyanın qonşu ölkə ərazisində təxribat aksiyaları keçirmək planının yeni olmadığını bəyan edib.
Ötən həftə Ukrayna Prezidenti Vladimir Zelenski moldovalı həmkarını Ukrayna kəşfiyyatının ələ keçirdiyi Rusiyanın Moldovadakı cəhdləri ilə bağlı məlumatları əhatə edən sənəd barədə məlumatlandırıb.
“Ukraynalı tərəfdaşlarımızdan alınan sənədlər bu təxribatçı fəaliyyətlərin təşkili üçün yerlərin və maddi-texniki aspektlərin lokallaşdırıldığını nümayiş etdirir”, - Prezident Sandu deyib.
Maya Sandu əlavə edib ki, plan ölkədən kənardakı insanların istifadəsini də nəzərdə tutur. Onun sözlərinə görə, sənədlərdə Rusiya, Belarus, Serbiya və Monteneqro vətəndaşları üçün Moldovaya giriş qaydalarına dair təlimatlar var.
ATƏT-in fəaliyyətdə olan sədri, Şimali Makedoniyanın xarici işlər naziri Bujar Osmani Moldovaya səfər edəcək.
“Növbəti iki gün ərzində Moldovaya səfər etməyi səbirsizliklə gözləyirəm. Ölkənin üzləşdiyi problemləri müzakirə etmək, sülh və sabitliyi təşviq etmək imkanlarını araşdırmaq üçün siyasi və icma liderləri ilə mühüm görüşlər keçirəcəyəm”, - Osmani bildirib.
