İyunun sonunda Gürcüstanda yaşayan Qazaxıstan vətəndaşı Diana Sılkina istirahət üçün Ermənistana gedib.
İnsanoid.com xarici KİV-ə istinadən xəbər verir ki, turistin məqsədi Dilican, Sevan gölü və digər yerləri gəzib, iyulun əvvəlində Yerevanda "Zemfira"nın konsertinə qatılmaq idi. Lakin 28 iyun səhəri Yerevan mərkəzindəki kafedə baş verən hadisə onun planlarını tam dəyişib.
Diana bir neçə ildir Gürcüstanda yaşadığı üçün ofisianta gürcü dilində və yüksək səslə müraciət edib. Bu, yan masada əyləşən digər müştərinin xoşuna gəlməyib. Bu səbəbdən qızı təhqir etməyə başlayıb və Diana ona cavab verib. Həmin şəxs polis çağırıb və sonradan ümumiyyətlə münaqişədə iştirak etməyib. Kafedən çıxarkən mülki geyimli şəxslər onu saxlayıb, zor tətbiq edərək maşına mindiriblər. Daha sonra polis bölməsinə aparılıb, 6 saatdan sonra isə 3 sutka İstintaq Təcridxanasında saxlanılıb. Bu müddətdə ona nə vəkil, nə də səfirliklə əlaqə imkanı verilib.
Polis əvvəlcə “inzibati qaydada cərimə” təklif etsə də, sonradan ona qarşı “xuliqanlıq” maddəsi ilə cinayət işi açılıb və ölkədən çıxışına qadağa qoyulub. İşdən ayrılmaq təhlükəsi ilə üz-üzə qalan Diana, zaminə buraxılmaq üçün 15 milyon dram (təxminən 66 min manat) tələb olunduğunu bildirir. Onun sözlərinə görə, bu məbləğ Ermənistan təcrübəsində belə işlər üçün həddindən artıq yüksəkdir.
Qazaxıstan səfirliyi rəsmi müraciətlər etsə də, Ermənistan hüquq-mühafizə orqanları diplomatik təmaslardan yayınır. Diana həmçinin sənədlərin yalnız erməni dilində təqdim olunduğunu, keyfiyyətli tərcüməçi verilmədiyini deyir.
Hazırda o, işin gedişini anlamadığını, günahkar bilinəcəyi təqdirdə məhkəmədən sonra məhkum kimi qeydiyyata düşəcəyindən ehtiyat etdiyini vurğulayır. Nəticədə bu hadisələr səbəbindən o, planlaşdırdığı "Zemfira"nın konsertinə gedə bilməyib.
