İstanbul Maliyyə Cinayətləri ilə Mübarizə İdarəsi tərəfindən aparılan araşdırmada aralarında məşhurların da olduğu sələmçiliklə məşğul olan 4 nəfər saxlanılıb.
İnsanoid.com xəbər verir ki, Ziyadin Bilgi adlı şəxs tərəfindən davamlı təzyiqə məruz qalan vətəndaşın şikayəti əsasında idarə hərəkətə keçib.
Ticarətlə məşğul olan Ziyadinin sələmçiliyin və ağır təhdid cinayətlərinin icraçısı olduğunu göstərən sənədləri tapılıb. O, saxlanılıb və rəqəmsal materialları müsadirə edilib.
Yaşayış və iş yerlərində aparılan axtarışlar zamanı sələmçilik cinayətlərinin əks olunduğu əlyazma sənədləri və rəqəmsal materiallar götürülüb.
Məşhurların sələmçisi kimi tanınan Örfi Bilginin evində aparılan axtarış zamanı müğənni Seda Sayan tərəfindən imzalanan sənədlər tapılıb.
Sənədlərdə Seda Sayana qeyri-rəsmi olaraq 5 milyon lirə ödəniş olunacağına dair məlumatlar əks olunub.
Polis bölməsində ifadələri alınan 4 şübhəli məhkəməyə gətirilib. Prokurorluq şübhəlilərin həbs olunması tələbi ilə onları cinayət işi üzrə növbətçi məhkəməyə göndərib.
