Ağcabədidə dostlar arasında bıçaqlanma olub.
İnsanoid.com-un əldə etdiyi məlumata görə, hadisənin istintaqı Lənkəran Ağır Cinayətlər məhkəməsində keçirilib.
Belə ki, hadisədə təqsirləndirilən Cavid Qədirov (ad şərtidir) 1986-ci ildə Ağcabədi şəhərində anadan olub. O, 2024-cü il fevralın 14-ü dostu Əli Vəliyevlə (ad şərtidir) birlikdə spirtli içki qəbul edib. Söhbət zamanı dostlar arasında mübahisə yaranıb. Mübahisə nəticəsində Cavid öncə Əlini döyüb, sonra isə qarnına iki dəfə bıçaq zərbəsi endirib. Hadisəyə səbəb Cavidin Əlinin keçmiş həyat yoldaşı haqqında nalayiq sözlər işlətməsi olub.
Cavid Qədirov Azərbaycan Respublikası CM-nin 126.1-ci (sağlamlığa xəsarət yetirmə) maddəsi ilə təqsirləndirilib.
Məhkəmə istintaqı zamanı təqsirləndirilən Cavid Qədirov özünü təqsirli bilərək ifadə verib:
“Əfsanə adlı qadınla ailə həyatı qurmuşdum. 2012-ci ildə onla rəsmi olaraq boşandıq və uşaqlarımla bərabər məndən ayrı yaşayırlar. Əlini isə uşaqlıqdan tanıyıram, eyni məhəllədə yaşamışıq. Hadisə günü onunla yolda qarşılaşdıq. Söhbət zamanı dostum toydan gəldiyini, bir ədəd araq aldığını bildirdi. Mən də evdə hazır yemək olduğu üçün birlikdə yeyib-içməyi təklif etdim.
Evə keçib yeyib-içdik və spirtli içkinin təsirindən sərxoş olduq. Əli keçmiş yoldaşım Əfsanə haqqında nalayiq sözlər istifadə etməyə başladı. Ona Əfsanə ilə ayrılsam da, uşaqlarımın anası olduğunu üçün belə sözlər danışmağın uyğunsuz olduğunu dedim. Lakin sözlərimə əhəmiyyət vermədi. Aramızda dava başladı. Əli söyüş söydüyü üçün onu bıçaqladım. Əməlimdən peşmanam”.
Daha sonra zərərçəkmiş Əli Vəliyev ifadə verib:
“Hadisə günü qonşum Aqilin oğlunun toyuna getmişdim. Orda yeyib-içdikdən sonra özümlə bir araq götürüb evə tərəf gedirdim. Yolda Cavidlə qarşılaşdım. Ona üzərimdə araq olduğunu deyəndə birlikdə yeyib-içməyi təklif etdi. Mən də razılaşıb, Cavidgilə getdik. Spirtin təsirindən sərxoş olmuşduq. Aramızda mübahisə yarandı, dalaşdıqdan sonra Cavid məni bıçaqla vurdu”.
Sonda məhkəmədə Cavid Qədirovun hadisədə təqsirli olması sübuta yetirilib. O, 4 il müddətində azadlıqdan məhrum edilib.
Fidan İlqar
