Azərbaycan fermerləri istehsal etdikləri südü sata bilmirlər, istehsalçılar müflis ola bilərlər. Bu sözləri aprelin 12-də "Azərbaycan Südçülər Assosiasiyası" İctimai Birliyinin sədri Samir Eyyubov Reporta açıqlamasında bildirib.
Sədrin sözlərinə görə, Rusiya-Ukrayna münaqişəsinə görə bu ölkələrdən süd məhsullarının gətirilməsində ciddi problemlər yaranıb. Bu vəziyyətdə yerli südə və süd məhsullarına olan tələbat artmalı idi. Lakin heç bir dəyişiklik olmayıb və istehsalçıların məhsulları əllərində qalıb.
S.Eyyubov əlavə edib ki, fermerlər məhsullarını maya dəyərindən də aşağı qiymətə təklif etsələr belə, müəssisələr yenə də onları almır.
O, həmçinin qeyd edib ki, son zamanlar südün maya dəyəri artıb: "Azərbaycan heyvan yemini, əsasən, idxal edir. Son vaxtlar xaricdə yem bahalaşıb və son nəticədə məhsulların maya dəyəri 40% artıb. Amma fermerlər satış qiymətini artırmayıblar və əvvəlki qiymətlə zavodlara təklif edirlər. Bununla belə, alış yenə də yoxdur”.
Bərdədən olan istehsalçı İbrahim Səfərov da məhsulunu sata bilmədiyindən şikayətlənib:
“Əvvəl məhsulumuzu bir neçə şirkətə satırdıq. İndi cəmi bir şirkət bizdən süd alır. 3,5% yağlılığı olan südün 1 litrini 61 qəpikdən alırlar. Halbuki, əvvəllər 80-85 qəpiyə satırdıq. Seçim olmadığı üçün məcbur olub dedikləri qiymətlə razılaşırıq”.
