Lənkəran Ağır Cinayət Məhkəsimənin hökmü ilə Salyan rayonunun Qardili kənd sakini, 1996-cı il təvəllüdlü Amin Cəfərli (ad-soyad şərtidir) azyaşlılara qarşı törətdiyi ağır cinayətlərə görə uzunmüddətli həbs cəzasına məhkum edilib.
O, Azərbaycan Respublikası Cinayət Məcəlləsinin 150.3.3-cü (köməksiz vəziyyətdə olan azyaşlıya qarşı seksual xarakterli zorakılıq hərəkətləri), 153.1-ci (mənzil toxunulmazlığının pozulması), 157.1-ci (azyaşlıya qarşı əxlaqsız hərəkətlər) və 180.1-ci (soyğunçuluq) maddələri ilə təqsirli bilinib.
Məhkəmənin qərarına əsasən, təqsirləndirilən şəxsə ayrı-ayrı maddələr üzrə müxtəlif cəzalar təyin olunub. Cinayətlərin məcmusu nəzərə alınaraq, qismən toplama yolu ilə ona 18 il müddətinə azadlıqdan məhrumetmə cəzası verilib.
Baku.ws xəbər verir ki, hadisə 2025-ci il avqustun 7-də səhər saat 05:00 radələrində Salyan rayonunun Qardili kəndində baş verib.
İstintaq materiallarında qeyd olunur ki, təqsirləndirilən şəxs həmkəndlisi olan qadının evdən işə getməsindən sonra açıq qapıdan evə daxil olub və azyaşlı qızlara – 13 və 14 yaşlı bacılara qarşı seksual xarakterli cinayət əməlləri törədib.
Bununla yanaşı, evdən 1000 manat pulun oğurlandığı da müəyyən edilib. Aparılan tibbi ekspertiza nəticələrinə əsasən, azyaşlılara qarşı zorakılıq faktı təsdiqlənib, xəsarətlər yüngül dərəcəli kimi qiymətləndirilib.
Məhkəmə prosesində təqsirləndirilən şəxs özünü qismən təqsirli bilsə də, azyaşlılara qarşı hərəkətləri inkar edib. Zərərçəkmiş qızlar və onların anası verdikləri ifadələrdə hadisəni təsdiqləyiblər. Şahid qismində dindirilən yaxın qohumların ifadələri də istintaq materialları ilə üst-üstə düşüb.
Məhkəmə toplanmış sübutları əsaslı hesab edərək ittiham hökmü çıxarıb.
