Azərbaycanda bəzi kişilərin nikah zamanı həyat yoldaşlarının soyadını qəbul etməsi diqqət çəkib. Bu addımın hansı səbəblərdən atılması barədə ictimaiyyətdə müzakirələr aparılır.
Maraqlıdır, kişilər niyə xanımlarının soyadını qəbul edir?
Globalinfo.az-a danışan Milli Məclisin insan hüquqları komitəsinin üzvü Azər Allahverənov deyib ki, qanunvericiliyə görə burada hər hansı qadağanedici hal yoxdur:
"Bu qərarların verilməsində sosial, praktiki və ya şəxsi amillər rol oynaya bilər. Bəzi hallarda gender bərabərliyinin bir göstəricisi kimi də dəyərləndirilir. Digər tərəfdən, bunun şəxsi seçim və fərdi yanaşma olması da mümkündür. Məsələn, bəzi hallarda ərin soyadı o qədər də tanınmış olmur, lakin xanımın soyadı məşhur, nüfuzlu və ya müəyyən bir nəslə bağlılıq ifadə edir. Belə hallarda həmin soyadın seçilməsi başadüşüləndir. Eyni zamanda, praktiki səbəblər də rol oynaya bilər. Məsələn, əgər qadının ailəsində soyadı davam etdirəcək kişi övlad yoxdursa, ər həmin soyadı götürərək onun yaşadılmasına töhfə vermək üçün belə addım atmış olar".
A.Allahverənov əlavə edib ki, səbəblər situasiyadan asılı olaraq dəyişə və sosial, psixoloji və şəxsi faktorlarla bağlı ola bilər:
"Azərbaycan cəmiyyətində bu kimi halların bəzən birmənalı qarşılanmaması mümkündür. Lakin bu, hər bir şəxsin fərdi hüququdur və qərar şəxsi seçimidir. Bu səbəbdən belə yanaşmalara hörmətlə yanaşmaq lazımdır. Nəticə etibarilə, oxşar hallar geniş yayılmasa da, cəmiyyətdə yeni meyillərin formalaşdığını göstərir. Gələcəkdə bu kimi nümunələrin artması ilə yanaşı, cəmiyyətin də bu məsələyə münasibətində dəyişikliklər baş verə bilər. Əsas olan isə insanların seçimlərinə hörmətlə yanaşılması və məsələyə obyektiv yanaşmanın qorunmasıdır".
